Nimin khan Durtlang Vety Dispensary bial chhunga NLUP hnuaia vawkvulh thlangtu chhungkaw 23 te hnenah tual vawk pathum theuh sem a ni.

NLUP 3rd leh 4th Phase hnuaia vawk note te hi a dawngtute hnenah AMC Ward No 1 Councillor Pi Zomuanpuiin a sem a ni. Pi Zomuanpuii chuan NLUP hnuaia tanpuina dawngtute chu a lawmpui thu hrilhin, sawrkar in policy a siam te hi a tihhlawhtling tu an ni em tih inzawtfiah turin a chah a; sawrkar in policy tha tak tak a siam thin a, amaherawhchu a hlawhtlinnna chu mipuite kutah a awm avangin NLUP tanpuina dawngtute pawhin an hlawhtlinpui ngei theih nan thahnem ngai turin a fuih a ni.

NLUP hnuaia vawkte semna hun hi Village Level NLUP Committee (VLNC) Treasurer Pu Laltlanzovan a kaihhruai a, Dr. Vanlalhruaia Pachuau, Veterinary Officer Durtlang in report a pek bakah NLUP hlawhtlinpuitu Pu Doliana, Durtlang in thu a sawi bawk a ni.

Durtlang Vety Dispensary bial chhungah hian NLUP 3rd and 4th Phase hnuaiah chhungkaw 192 ten vawkvulh (piggery trade) an thlang a, tun dinhmunah hian chhungkaw 84 hnenah sem tawh niin chhungkaw 108 te hnenah tanpuina sem hmabak a ni a, ruahman dan chuan kumin October hmain sem zawh tum a ni.