Vawiin chawhma khan Lunglei District-a ERO leh AERO te tan Lunglei DC Conference Hall-ah ERONet chungchang training buatsaih a ni a. Lunglei DC leh District Election Officer ni bawk Pi Lalzarmawii, IAS chuan a hmanpui.
Pi Lalzarmawii chuan ERONet hmangin Electoral Roll-a hming belh, paih leh tihdanglam chungchang hi rampuma link vek tur a ni, a ti a. CEO atanga Data Entry Operator thlengin tih tur kan nei theuh dawn a, kan tih turah kan chian hle a ngai dawn a ni, a ti. Democracy ramah chuan election chu hna pawimawh tak, taima taka thawh ngai a ni tiin, training chu chhawr tangkaia mi rawn tlak tura a duh thu a sawi a ni. Tun dinhmunah Lunglei District-ah ERO pasarih (7) leh AERO pariat (8) an awm thu a tarlang bawk a ni.
He training hi Election Officer Pu James Lalnithanga’n a kaihruai a. District Level Master Trainer (DLMT) Dr. Malsawmtluanga Fanchun, Lunglei BDO chuan ERONet chungchang zirtirna a pe a ni.
ERONet hi Election Commission of India (ECI) buatsaih a ni a, mipuiten internet hmangin awlsam zawkin Voter ID thar emaw Voter Card tihdanglam an dil thei tawh dawn a ni.
