2053/2023-2024

Hnahthial the 29th September 2023: Ni 2 chhung awh tur Hnahthial District Basketball Association (HDBA) buatsaih MLA Cup Basketball Tournament hawnna programme chu nimin khan Basketball Court-ah Minister leh Bialtu MLA ni bawk Dr R Lalthangliana chuan a hmanpui.

Khuallian chuan MLA cup khel tur team-8 te chu duhsakna hlanin an thiamthilte eizawnna tling khawpa chhawr thiam turin a fuih a, tunlai khawvelah infiamna chu eizawnna tlak a nih tak zel thu sawiin theihtawpa tang zual zel turin a fuih a ni. Taksa hriselna a pawimawh hle tiin hrisel loh chu engkim hlohna a nih thu a sawi a. hriselna chu mahni ah thui tak a innghah thu sawi bawkin taksa sawizawi uar zual sauh sauh turin kalkhawmte a fuih a ni. Hnahthial District, Khawhri khua lal huaisen lal Zakapa chânchin tawi sawiin a mah anga ram leh hnam tan huaisen taka din ngắm a pawimawh a ti a, lal huaisente leh ram leh hnam chhan nana nun hlan tute hlut thiam a,an mahni a zir tur tam tak awm te chu thalaite rilruah ram hmangaihna thinlung petu ni zel se a duh thu a sawi bawk. Tournament hlawhtling tak an neih theih nan duhsakna hlanin basketball court duhthusam lo chu siam that sak thuai a nih dawn thu a tarlang bawk a ni.

Nimin programme hi C Lalrehlova’n a kaihruai a, Hnahthial District Basketball Association Secretary hnen atangin report ngaihthlak a ni. MLA Cup Basketball Tournament hian lawmman pawisa fai cheng 20000 a keng tel a ni.