2054/2023-2024

2023 Mimkut thla ni 29: Nizan khan Mizo Zaimi Inzawmkhawm (MZI) Rorel Inkhawm 2023 hun hnihna, zan lam hun Kolasib Diakkawn YMA Hall-a buatsaih chu Kolasib District Bawrhsap Pu John LT Sanga chuan Khuallian niin a hmanpui.

Kolasib Bawrhsap Pu John LT Sanga chuan MZI-in Kolasib-a Rorel Inkhawm an nghah avanga lawm thu sawiin, hei hian Kolasib District-a zai leh rimawi lama tui mite tan phurna leh hmasawnna a thlen ngei ang, a ti a. Kolasib chu Mizoram luhka a nih angin District pawimawh tak a ni a, district lian ni lo mah se, ṭhalai talent nei ṭha tak tak awm khawmna a ni a, zai leh rimawi lamah pawh theihna nei sang tak tak, an theihna hai chhuah theih tur eng emaw zat an awm a ni, a ti. Kolasib Bawrhsap chuan Mizo hnam nunphungah rimawi chu a bet tel tlat tih sawiin, Bible aṭang leh khawvel chanchin aṭanga thlirin rimawi chu thlarau sual hneh theihna, inrem lote inremtir theihna a ni a, rimawi chuan hneh theih loh a neih loh avangin rimawiah kan ṭhalaite kan tuitir chuan ruihhlo dona hmanraw ṭangkai takah pawh a hman theih ngei ang, a ti a. MZI-in Rorel Inkhawm beh chhana District Hospital Kolasib Poor Fund puala charity concert an buatsaih chu lawmawm a tih thu sawiin, Rorel Inkhawm 2023 dawltu Kolasib Headquarters kutah ṭanpuina pawisa fai a hlan bawk a ni.

He hun hi MZI Kolasib Headquarters President Pu Vanlalzawna'n kaihruaiin, MZI General Headquarters Zaipawlin hla an rem a. MZI General Headquarters President Er Lalrothanga chuan thu sawiin, MZI chuan "Unity Through Music" tih thupui neiin rimawi kal tlanga inpumkhatna a tlangaupui a, Mizote thu leh hla leh rimawiah hmasawnna thlen tumin theih tawpin hma a la a ni, a ti a. Hnam ziarang kalsan si lova hla chi hrang hrang phuah a, siam belh zel pawimawh a tih thu sawiin, hla phuahtute leh zai mite pawh chu lam hawia ke pen zel tur chuan a chah a ni.

He hunah hian Zoram khawvel rimawi huanga thawh hlawk tak tak mi 4 hnenah Life Membership Certificate hlan a ni a. District Hospital Kolasib Poor Fund pualin charity concert buatsaih chhunzawm niin, zaithiam hrang hrang an zai a, DHK poor fund pual hian bawm dawh a ni.

MZI hi kum 1980 August ni 30 khan din a ni a. Rorel Inkhawm hi General Conference nen a kum kar thlaka hman ṭhin a ni a. Kumin Rorel Inkhawm hi MZI Kolasib Headquarters chuan dawlin, September ni 28, 2023 (Ningani) chawhnu lamah Diakkawn YMA Hall-ah General Headquarters, District Headquarters, Sub-Headquarters leh Branch hrang hrang aṭanga palaite'n ro an rel a. He hunah hian member chatuan ram pan tate sunna hun hman niin, MZI Dan Bu thar tlangzarh a ni a. Headquarters tin aṭangin report ngaihthlak a ni bawk.