2087/2023-2024

Hnahthial the 30th September 2023: Hmeichhiate zahawmna humhima, chhan tlat thin tu Mizo lal Zakapa pualin vawiin khan a lalna tlang Khawhri khuaah chawimawina hun hman a ni a, bialtu MLA leh Minister ni bawk Dr. R. Lalthangliana chu a thlengtu niin Pu Lalrintluanga Sailo MLA & Dy Chief Whip bakah Dr. L. Thangmawia MLA & Human Resources Development Board Vice Chairman-te chu a uaptu an ni.

Lal huaisen Zakapa chawimawina hunah hian Minister Dr. R. Lalthangliana chuan Mizo lal zingah lal tha tak tak an awm thin a, lal Zakapa tawn ang erawh an tawng vek lo maithei tiin lal in a khua leh tuite tana a tih tur dik tak, huaisen taka hmeichhiate zahawmna humhim saktu a ni a ti a, chawmawi a phu hle a ti. Mizo hnam nunphung leh ziarang vawn nun thar a nih leh theih nan te, thangtharte nunah Mizo hnam hmangaihna a len zel theih nan he hun hi buatsaih a nih thu a sawi. Ram chuan development a mamawh rualin ram leh hnam humhalh a ngai hle a ti a, zo nun zemawi dik tak chu lan chhuah tir fo a tul thu a sawi bawk.

He hun a thupui 'Zakapa leh Mizo Nationalism, thangtharte tan' tih sawitu Dr. H. Laldinmawia, Asst Professor, PUC pawhin thu sawiin Zakapa chuan Mizo hmeichhiate chhanna atana Mizo nun zemawi a chhawm nung leh humhalh tlat kha chhinchhiah tlak tak a ni tiin chhuanawm a tih thu a sawi bawk a, Zakapa chu awpbet tu te hnehtu a nih thu tarlangin thangtharte ngaihsan tur dik tak a ni, a ti bawk.

Lal huaisen Zakapa chawimawina hunah hian Pu Lalrintluanga Sailo, Dy Chief Whip, HRD Board Vice Chairman Dr. L.Thangmawia, C.YMA President Pu R.Lalngheta, MZP President Pu Lalnunmawia Pautu, MSU President Pu Samuel Zoramthanpuia, MHIP Gen. Secretary Pi Lalliani leh Mizoram sawrkar buatsaih Zakapa Award dawng hmasa bertu Dr. Lalrinawmi Ralte te pawhin thusawina hun an hmang bawk a, Pi Zonuni Pachuau chuan he hun hi kaihruaiin Upa F. Aingura, BCM Khawhri chuan hunserh a hmang a, Pu B. Lalengliana,VCP Khawhri chuan kalkhawmte lawmna thu sawiin Pu HC Vanlalhriata, President, YMA Khawhri chuan lawmthu sawiin hun a khar a ni.