2088/2023-2024

Aizawl the 30th September, 2023: Vawiin Chawhnu khan Reiek Community Hall-ah Best Tourism Village of India 2023 lawmna neih niin NESIDS (North East Special Infrastructure Development Schemes) Leh PRASAD (Pilgrimage Rejuvenation And Spiritual Augmentation Drive) hnuaia project kalpui tur chu Pu Robert Romawia Royte, Tourism Minister chuan khuallian niin lungphum a phum nghal a. He hunah hian Pu T.C Pachhunga, Ex-MLA, Vice Chairman, Tourism Development Board chu khualzahawm a ni.

Khuallian Tourism Minister Pu Roberta  chuan India ramah best tourism Village dawng thei tura min phochhuaktu tourism department a thawktu zawng zawngte hmalakna chu fakawm tiin an chungah lawmthu a sawi a. He lawmman avangin hian Reiek khua chu khualzin tlawhtu leh ngaihventu an tam phah hle dawn avangin khawtlang mipuite tan la zel turin a chah a. Tunah hian khawvel pum huap Best Tourism Village inelna buatsaih mekah Reiek  chu candidate Village a ni ve a, beiseina sang tak nen kan thlir mek a ni a ti bawk. Reiek mipuite chu khualzin mite lo dawnsawn kawngah best tourism Village lawmman dawngtu an nih ang ngeiin hawihhawm chhuah zel turin a chah bawk.

Pu T.C Pachhunga chuan Reiek khuain khualzin mite hipna kawnga thangchhuah thei dinhmuna an ding chu thil lawmawm tak leh ropui tak a ni tiin kan Minister hmalakna a zarah kan ram mai bakah Reiek khua-ah tourism lama hmasawnna rotling hmuh tur a awm chu a lawmawm tak zet a ni a ti. India Ram khaw nuai 6 chuang awmna atanga khualzin hipna lama a tha ber nihna inhauh theih nachhan chu inkhawtlang tanrualna, taihmakna leh hawihhawmna vang a ni tiin theihtawpa tourism department thawhpui zel turin a chah a ni.

Pu V. Lalengmawia, Jt. Secy, Tourism/Member Secretary, MTDA chuan NESIDS & PRASAD chungchangah report pein Development Works at Khuangchera Cave, Reiek and PFC (Pilgrim Facilitation Centre) at Reiek Peak Cheng Nuai 361.27 senga Ministry of Tourism, Government of India hnuaia thawh tur a ni a. A hna hi June, 2025 a thawh zawh fel tura ruahman niin Excell Consultancy Services, Mission Veng Aizawl te'n an thawk dawn a ni. 

Vawiin vek hian Development of Infrastructure for Tourism at Reiek and Reiek Tlang, cheng Nuai 560 hmanga NESIDS (Doner), Government of India hnuaia component hrang hrang D.J Consultation Services Chaltlang, Aizawl te'n July 2020 atanga hna an thawh tawh chu Tourism Minister hian a hawng nghal bawk a ni.

Dr. R. Lalrinchhani, Dy. Director, Tourism Department chuan India Ram pum huap a Best Tourism Village, 2023 lawmman an dawnna tura Department leh Reiek mipui hmalakna tlangpui a tarlang bawk. 

He hun hi Dr. Lalrozama, IAS, Secretary, Tourism Department chuan kaihruaiin Pu C. Lalrozama, VCP, Reiek pawhin thu a sawi a. Pu Saitluanga, Director, Tourism Department chuan lawmthu a sawi bawk. 

Vawiin Best Tourism Village lawmna leh NESIDS leh PRASHAD Project lungphum phumna pual hian khawtlang huap ruai buatsaih a ni bawk a ni.