Health Minister Pu Lalrinliana Sailo chuan vawiin chhun khan Aizawl Press Club-a inkhawm buatsaihah AIDS natna do kawng atana lehkhabu tangkai tak tur ‘HNEHTU NGAWICHAWI’ tih chu a tlangzarh.

HIV/AIDS natna vei mek mi 25 laiin he natna an vei dan leh harsatna hrang hrang an tawh mek thute bakah hengte atanga midangte tana zirtir theitu an nih theih dan huaisen taka an puanzarna lakkhawm Pu Darthakunga ziak tlangzarh hian Health Minister chuan Health Department a chantirh lai chuan a mawhphurhna chu huphurh awm hlea a hriat thu a sawi a. Amaherawhchu a taka a luhchilh hnuah erawh chuan a bikin Cancer leh AIDS natna do kawngah theihtawp chhuah a inhuam dan a sawi a, a hun chhung ngei hian helam kawngah hian theihtawp a chhuah tur thu kalkhawmte chu a hrilh a ni. Zu leh sa, zuk leh hmuam kawngah hian Mizote hi kan fihlim tawk lo tiin hengte avang hian kan chhungkhat kan thlakhlelh ngawih ngawih kan chan thin a ni, a ti a. He lehkhabu mipuite chhiar tura a tlangzarh tak chu damdawi tha tak nise a bikin AIDS natnain a tih buai mekte tan nachhawkna chak tak ni thei se a duhthu a sawi a. AIDS natna do mek tlawmngai pawl hrang hrangte chu phatsan a tum lo a ni Lalrinliana Sailo chuan a ti.

Lehkhabu tlangzarh tak chhungthu chu Dr.Eric Zomawia, Project Director, MSACS in a sawi zauva, a buatsaihtu Darthakunga pawhin a ziak chhan leh thil tumte a hrilhfiah bawk.