2261/2026-2027

Dated Aizawl, the 18 September 2026: Vawiin khan Health & Family Welfare Department Minister Pi Lalrinpuii chuan, a office chamber, MINECO-ah, Health Department leh ICT Department tangkawp buatsaih Luhkapui Portal chu October ni khat 2026 atanga mamawhtu apiangte hman tan theih turin a hawng.

Hawnna hunah hian Health & Family Welfare Department changtu Minister Pi Lalrinpuii chuan thusawiin, India state-te zinga digital-a engkim kalpui nasa ber State nih tuma Mizoram tan lakna nena inmil tak Luhkapui Portal hawn a ni ta chu lawmawm a tih thu a sawi a. Sawrkar laipuiin ram chhunga eizawnna leh sumdawnna hrang hrangte zalen leh langtlang zawka kalpui a nih theih nana dan leh hrai thenkhat thlah dul tura a hriattirna De-regulation 2.0 hnuaiah ngaihpawimawh bik (Priority area) 19 leh 20-nate thlir chungin Luhkapui chu hawng ta an ni tih sawiin, chu chuan mamawhtu mipuite nasa takin a chhawk zangkhai ngei a beisei tlat tih a sawi a. Portal chu a taka kalpui a nih hunah chuan dilna lut leh pek chhuahte pawh chak leh langtlang zawka a kal theihna turin SNA-te chu theihtawp chhuah tura chahin, sawrkar inrelbawlnate samkhai zawka kalpui (ease of doing business) chu Sawrkar laipui leh Mizoram sawrkar pawhin a ngaihpawimawh ber pakhat a ni a ti a. Portal chu hlawhtling taka kalpui a nih theihna turin Department hrang hrangte thawhona pawh a tul hle dawn a ni tih Minister chuan a sawi bawk.

Vawiina hawn tak Luhkapui Portal hi Dawmdawi lama eizawnna kalpui tur ten License dilna an theh luhna atan te, dan hnuaia endik hnua license pek chhuah lehna tur atan te-a Department leh heti lama mithiam ten an hman atan ruahman a ni a. Mipui vantlang he portal mamawhtute chuan kumin October ni khat atang hian Portal hi an hmang tan thei tawh dawn a ni.

Luhkapui Portal hawnna hi Pi Lalzarmawii, Commissioner & Secretary, Health & Family Welfare Department chuan kaihruaiin, Pu C. Lalrinfela Informatics Officer, ICT Department chuan portal siam chhoh a nih dan leh nihphung hrang hrangte a sawifiah a. Pi Merilyn Rualzakhumthangi, Deputy Secretary, chuan lawmthu sawiin hun hi a khar a ni.