2260/2026-2027

Dated Hnahthial, the 18^th September, 2026: Vawiin khan DC Conference Hall, Hnahthialah Bawrhsap, Pi K. Vanlalruati chuan Faina Beihpui Thlakna - Swachhata Hi Seva 2026 chu zirlai leh sawkar pisa hotu kalkhawmte hmaah a hawng a. Addl DC, Pu Zothanmawia Khiangte leh Sr. EE PHE, Er. Lalhruaitluanga te chuan thu sawina hun hmangin DUDO, Pi Christina Lalnunfeli chuan hun a kaihruai a ni.

Bawrhsap chuan Faina chu khawtlang timawi a, tichangkangtu a nih avangin faina kawnga inchawk tho leh tura kalkhawm an nih thu a sawi a. He faina hapta kan neih chhan, kan ram pa, Mahatma Gandhi-a ngei pawhin zalenna ai mahin faina chu pawimawh a tih zawk thu sawiin faina tel lo chuan hmasawnna a awm theih loh thu a sawi a. Fai tur chuan mahni atanga tan a pawimawh thu sawiin "Mimal faina chuan chhungkaw faina a thlen a, chhungkaw faina chuan khawtlang faina, khawtlang daina chuan changkanna leh hmasawnna a rawn thlen a ni " tiin faina chu kan zavaia mawhphurna a nih thu a sawi a ni.

Addl DC, Pu Zothanmawia Khiangte chuan Hnahthial District chu Mizoram District inelna hnuhnung berah District fai lo ber a nih thu sawiin hmasawn kan mamawh zia tarlangtu a nih thu a sawi a. Pakhatna ni thei turin hmabak a la ko thu sawiin zirlai naupangte, khawtlang hruaitute leh sawrkar lama hotute chu faina kawnga tan lakpuiah a sawm nghal a ni.

PHED Sr. EE, Er. Lalhruaitluanga chuan kalkhawmte chu faina beihpui chhung chauh ni lo vin kan nitin nunah faina chu behtir turin a chah a. Fai tura pawimawh ber pakhat chu tui thianghlim leh hnianghnar a nih thu sawiin PHED a thawktute thawhrimna zarah Hnahthial chu tui hnianghnar berte zinga mi an nih thu a sawi a. Bawlhhlawh paih dan mumal lo hian kan chhehvel leh kan tui tlan a tihbawlhhlawh thin thu sawiin chu chuan natna tam tak a thlen thin thu a sawi a ni. Kalkhawmte chu thianghlimna kawnga ke pen thar leh tura sawmin kan tui dawnte chu renchem taka hmang a, hnianghnar taka dah khawlna nei thin turin a chah nghal bawk.

Pi Julie Hmingthantluangi, Inspector of Sanitation hnen atangin Hnahthial District chhunga Swachhta hi Seva 2026 kalpui tum dan tlangpui ngaihthlak niin Pu R. Lalmuankima, District Coordinator, WASH hnen atangin SWM Rules, 2026 hnuaia bawlhhlawh thliar dan tur thlir ho a ni.

Swachhata hi Seva 2026 hi October ni 2 thleng kalpui tur niin a hnuaiah hian activities hrang hrang kalpui tum a ni a. A duh apiang tana tel theih turin Waste to Art Competition buatsaih tur niin October ni 2 hian intlansiakna, Swachhata Run neih tur a ni bawk ang.