2010/2023-2024

Mamit 26th, September, 2023 : Vawiin khan Dr. R. Lalthangliana, Hon'ble Minister Health & Family Welfare Department etc. chuan Mamit District Hospital khum 100 awmna chu a mamawh a piangte hman turin a hawng.

Khuallian Dr. R.Lalthangliana chuan Mamit chu India rama Aspirational District 115 zing a pakhat a ni a. Aspirational District atan hian thlur bing pawimawh tak tak pahnih- hriselna ngaih pawimawhna leh zirna ngaih pawimawhna a tel a ni a ti a. Hei hian hamthatna tamtak a keng tel a, he hospital dinna a tana pawisa hman chungchangah uluk takin bialtu MLA leh a thawktute'n hma la in, Infrastructure din piahlamah bungrua khawl leh thildang bun nan funding hi hman ni a, bungrua thenkhat la bun belh a ni dawn bawk thu a sawi.

Khuallian chuan Mamit District chu Central sawrkar lakah a langsar vah tih hria ila, Health & Family Welfare Department pawhin tan nasa takin a la a, chung zingah chuan Mamit District chhunga W.Phaileng PHC chu Community Health Centre ah hlankai a nih thu a sawi a, he CHC hi a chheh vel khua mipuite tan tangkai taka hriselna lama hmasawnnan hmang se tiin duhsakna a hlan a ni. Minister chuan hmasawnna ruhrel chuan thawktu (man power) a mamawh belh dawn a, hmalak zel a nih tur thu a sawi bawk a ni.

Dr. R.Lalthangliana chuan Mizoram chhungah Clinic 235 hawn a nih thu sawiin, hengah hian hmun kilkawr-ah pawh nau neihna facility te pawh a awm tawh a ni tih a sawi a. Mizoram Health Strengthening Project chu kalpui niin hei hian mamawh zualpui tuamhlawmna a kalpui mek thu a sawi bawk a, heng bakah District 3 ah CMO Office hawn a ni bawk a ni a ti a. Mamit bakah Siaha, Lawngtlai leh Champhai Hospital ah 100 Bedded District Hospital hawn tawh a ni a ti a, tun dinhmunah hmabak lian tak Serchhip ah kalpui mek a ni a ti a. Kolasib District ah 100 Bedded Hospital sak mek a nih thu leh ZMC leh Champhai Hospital ah covid in a hrin chhuah natna bik khirhkhan, Critical Care Block buatsaih a ni bawk a. Heng bakah tun hnaiah Director of Nursing din leh a nih thu a sawi bawk a ni.

Dampa Bialtu MLA & Deputy Chief Whip Pu Lalrintluanga chuan damlo enkawltute tan patient kan neih zawng zawng te hi kan VIP an ni tih hi thinlungah senglut ila, vawiina Mamit District in 100 Bedded District Hospital a nei chu lawmawm a tih thu sawiin damlo te'n damna an chan theihnan duhsakna a hlan nghal a ni.

Bialtu MLA leh Vice Chairman Roads & Infrustructure Development Board nibawk Er. H.Lalzirliana pawhin thu sawiin Mamit tan bung thar kaiin, sawrkar hmasa atanga ngaihtuahna awm tawh a ni a, tun sawrkar in a chhunzawm thei hi lawmawm a tih thu a tarlang a. Department a hnathawkte thahnemngaihna rah chawrtu Mamit mipuite an nih thu sawiin khawtlang mipui te inpekna pawh lawmthu a sawi a.

Funding petu Power Finance Corporation (CSR Initiative) chungah pawh lawmthu a sawi bawk a ni.

Dr. Lalrinfela H, District Medical Superintendent technical report peka a lan danin Mamit District Hospital hi Rs. 16,93,35,000.000/- (vaibelchhe sawmparuk nuai sawmkua pathum singthum sangnga) senga Zamzo Engineering, Construction & Consultancy te'n an sak niin, Dt.4th September, 2020 ah sak tan niin a sak zawh hun tura ruahman hi Dt 5th September, 2022 a ni. Building hi mizopa chhiara chhawng 5 a ni a, total floor area 4240.78 sqm a ni. First Floor-ah hian Elderly Ward dah a ni a. Male & Female ward bakah ward dangte dah a ni bawk.

He hun hi Pi Esther Lalruatkimi, IRS Principal Secretary, H&FW chuan kaihruaiin, Dr. Vanlalsawma, Principal Director, H&FW pawhin thu sawiin, Dr. SR. Ngurchamliana, Addl Director, Hospital & Medical Education-in lawmthu sawina a nei bawk.