1091//2023-2024

Aizawl, 11th July, 2023 : Health Minister Dr. R. Lalthangliana chuan vawiin khan MINECO-a a pisaah India rama nurse chawimawina sang ber “National Florence Nightingale Award. 2023” dawngtu Pi C. Zopari chu lengah sawmin chawimawina thuziak leh tangkafai a hlan.

He hunah hian Dr. R. Lalthangliana chuan Mizo zinga National Florence Nightingale Award dawng kan nei thar leh chu a lawmawmin a ropui takzet a, nurse te chu midangte tana inpe leh malsawmna ni chhunzawm zel tura chahin Pi C. Zopari chawimawina dawn hian midangte cho phur se a duh thu a sawi a ni. Mizo nurse te chu an fel bakah an thiam bik nia a hriat thin thu sawiin India ram chhung leh khawvel ram hrang hrangah mizo nurse an awm ve tawh te hi a lawmawm a, an kalna apiangah an taimak leh damlo an duat thiam avangin an hming a tha a, fak an hlawh zel a, tunhma ang kha a ni tawh lova kan nurse ram pawna awmte hi an tuar a chhel em em tawh a, ram pawnah nurse mamawhna a sang eem avang hian Mizorama nurse tha taktakte hian tuipuiral thlenga thawk turin tan an lak a tul a ni a ti a. Nursing hi Mizoramin resource kan neih that berte zinga mi a nih avang hian Mizoram leh hnam hmingthatna tur pawhin an pawimawh hle a ni a ti.

Health & Family Welfare Board Vice-Chairman Dr. ZR Thiamsanga pawhin Pi C. Zopari nen hun rei tak Civil Hospital, Aizawlah an lo thawh dun tawh thu sawiin a taimakna, a inpekna leh a rintlakna hi a chhuanawmin he award dawn hi a phu hle tih a sawi a. National Florence Nightingale Award hlut zia tarlangin he award dawngtute tan hian kawng hrang hranga hamthatna siam sak an phu hle nia a hriat thu a sawi bawk a ni.

National Florence Nightingale Award dawngtu Pi C. Ropari pawhin Mizoram sawrkarin an lawmpuinaah lawmthu sawiin, thingtlanga a hun tam zawk a thawh thu leh hmun hla, damdawi awm mumal lohna hmunah pawh a theih ang anga tan a lak thin dan te a sawi a, ama sum pawh seng hiala damlo enkawlna kawnga tan a lak dante, damlote mamawh damdawin a awm loh chang pawha hma a lak thin dante tarlangin tupawh hian kan hna theuh hi tui taka kan thawh chuan kan rin phak bak hian a rah tha kan seng thin a ni a ti.

June ni 22, 2023 chawhma dar 11:00 khan Rastrapati Bhavan, New Delhi-ah India rama Nurse chawimawina sang ber National Florence Nightingale Award chu Pi C.Zopari, Ward Superintendent (Retired) Dinthar, Aizawl hnenah India President Pi Droupadi Murmu chuan a hlan a ni.

Pi C.Zopari hian 1985 ah School of Nursing, Civil Hospital Aizawl atangin GNM a zir zova. 1986 atanga Staff Nurse hna thawk tanin Mizoram hmun hrang hrang heng Buarpui PHC, Chhingchhip PHC, District Hospital Siaha leh Civil Hospital Aizawl-ah te post a ni a. Kum 2016 August-ah Ward Superintendent ah promotion a hmu a, District Hospital Kolasib leh Civil Hospital Aizawl-ah kum 37 chhung rinawm taka a thawh hnu in 31st March, 2023-ah Superannuation Pension in a chhuak a ni.

Pi C. Zopari hian heng Health Centre hrang hrang a thawh chhung hian mi engemaw zat nunna a chhanhim a, chung zinga langsar zual te chu:

1. 18th April 1989 khan naute kum khat mi a hrawk a naute hnute hnekna tang avanga thaw hlei thei tawh lo duk vek tawh chu a theihtawp chhuah a enkawlin a hrawka tang chu lakchhuah sakin a nunna a chhanhim sak a ni. Tunah hian he naute hi kum 34 mi niin Mualpui, chhingchhip ah a cheng mek a ni.

2.  20th February 1993 khan Chhingchhipah a naute chhar hlam ek ei nasat avanga thaw hlei thei tawh lo leh tap thei tawh lo chu a ka-ah thawktir tuma hamin (CPR) a theihtawpa a beih hnu-ah naute nunna a chhanchhuak a ni. He naute hi tunah kum 30 mi niin hrisel takin a la dam a ni.

3. October 1996 khan Chhingchhip-a chhungkaw pakhat chaw eikhawm zing a mi Lalbuatsaiha hrawka ar ruh tang chu theihtawp chhuaha enkawlin a nunna a chhanhim sak a ni. Lalbuatsaiha hi nupui neiin tunah hlim takin Chhingchhipah a cheng mek a ni.

4. 14th April 1994 khan Chhingchhip PHC-ah nu nau vei chau tak leh nikhaw hre lova awm tawh, Aizawl lam pan thei si lo, nu pum chhunga naute leh a lungphu chiang tawh bawk silo chu Pi C. Zopari hian huaisen tak leh thiam takin 17th April 1994 khan naute chu a chehchhuah sak a (Forceps delivery) nu leh naute nunna a chhan himsak a ni. Tunah hian he naute hi kum 29 mi niin pasal te a nei a, a nu nen hlim takin an la dam a ni.

5. Inawhhlum tum mi 3 a chhanchhuak a, nikhawhre lo a let der tawhte pawh buaipuiin an rawn tha chhuak leh a ni.

6. Tur ei vanga thi tep pakhat pawh ramhmul damdawi a siam chawp hmangin a chhanchhuak bawk.

Vawiin National Florence Nightingale Award dawng chawimawina inkhawm hi Pi Lalchhanhimi, Joint Director (Nursing) in a kaihruai a, Pi Esther Lalruatkimi, Principal Secretary, H & FW Department leh Dr. PC. Lalramliana, Principal Director, H & FW Department ten lawmpuina thu an sawi a ni.

Nurse hnathawk thate chawimawina 'National Florence Nightingale Award' hi kum 1973 atanga kalpui tan a ni a, Mizoram Nurse 15 ten he Award hi an dawng tawh a ni. He Award hi Nurse zirtirtute, damlo enkawla hospital-a thawkte leh public health-a thawk ANM-te tan dil theih vek a ni a. He award hi kum tin dil theih niin, Health department hotute chuan tun aia uar zawka dil turin nurse te an chah a ni.

Vawiin award lawmna inkhawmah hian Pu Vinay Kumar, IAS, Special secretary, H&FW pawh a tel a, Mizoram Nursing Council, Mizoram Government Nursing Service Association, Trained Nurse Association of India (Mizoram Branch) aiawhte leh Pi C. Zopari chhungte an tel bawk a ni.