1092//2023-2024

Hnahthial the 11th July 2023: Vawiin chawhma khan Government Hnahthial College-ah Nehru Yuva Kendra (NYK) buatsaih District level Yuva Utsav (Youth Festival) chu Human Resource Development (HRD) Board Vice Chairman Dr. L.Thangmawia chuan khuallian niin a hmanpui.

He hunah hian khuallian Dr. L. Thangmawia chuan Yova Utsav(Youth Festival) chu hawngin, thalaite chu Hnahthial District a function tak avanga a lawmpui thu leh Hnahthial chu district a lo nih tak avanga District level thalai intawhkhawmna buatsaih a lo nih theih phah ta chu a lawmpui thu a sawi a. District Headquarters ken tel office tam tak te dah chho zel turin sawrkar chuan chak takin a bawhzui char char a ni a ti.

Dr. L Thangmawia chuan a thim zawnga thlir thin mi thenkhatin ram chhiatna lai an aupui uar viau laiin Zoram thalaite zingah ruihhlo leh thil tha lo laka insum thei, entawntlak tam tak an awm mek a ni a ti a. Thalaiten hnam hmangaihna thinlung nen a, mahni nuam tihna (comfort zone) kalsan a, chhungkua, khawtlang leh ram tana nasa zawka tan lak a ngaih thu a sawi bawk. Khuallian chuan program huaihawttu NYK chu hun rei tak kalta atanga India ram thalaite tana ke lo pen tawh thin a ni tiin vawiin program host-tu Govt. Hnahthial College pawh kum tam tak Mizorama zirna hmasawn nana lo tang tawh a ni, a ti a. Tunhnaiah ‘Symposium on Sustainable Development Goals’-2023, College zirlai hrang hrang ten project siama, inelna an neihah Mizoram pumah pakhatna a hauh pha hial a, Website Excellence Award 2022-2023, Mizoram sawrkar hnuaia Institution hrang hrang ten Website an enkawlna leh an hman tangkai dan inelnaah Institution zingah website hmang tha pasarihna (7) ni pha bawkin Hnahthial District chhunga sawrkar office hrang hranga Eco-friendly environment tehnaah 'Green Champion' a nih mek bawk thu sawiin Govt Hnahthial College zirlaite chu an entawntlak hle a ni a ti a. Mizoram mai ni lo, National leh International level-ah an thawhrim chuan an langpha reng a ni tih leh Hnam hmangaihna rilru atangin ram hmasawnna a piang a ni tih hre reng tura chahin; mahni leh chhungkua tan chauha thawh chuan hlimna tluantling a thlen lo a, ram leh Hnam tana inpekna hian hlimna tluangtlin a thlen tih hre reng turin zirlai kalkhawmte a chah bawk.

Yuva Utsav (Youth Festival) hawnna inkhawm zawh hian Dr L Thangmawia chuan Hnahthial District chhunga Department hrang hrang buatsaih exhibition stall hawnna a nei nghal bawk. Vawiin hawnna inkhawm hi Pi Mercy Sellate, Deputy Director, NYK, Lungleiin a kaihruai a. Pu Lalsiamthanga Principal, Govt. Hnahthial College pawhin thu sawi bawkin, Dr C Hmingsangzuala, Asst Professor in lawmthu sawiin hun a khar a ni.

Vawiin hun hi session-3 a then a ni a, 1st session ah hawnna inkhawm buatsaih niin, 2nd session-ah Declamation contest neih a ni a, 3rd session-ah cultural event-Folk Dance Competition neih a ni.