1093//2023-2024

2023 Vawkhniahzawn thla ni 11: Lawngtlai District chhunga Chamdur Area Oil Palm Growers' Society (CAOPGS) te tana Agriculture Department-in National Mission on Edible Oils - Oil Palm (NMEO-OP), 2022-2023 atanga Custom Hiring Centre a dina dah tur tractor leh trailer inhlan chhawnna hun chu vawiin khan Lawngtlai DAO Conference Hall-ah buatsaih a ni.

He hun hi Lawngtlai District Agriculture Officer (DAO) Pu V. Zamliana chuan kaihruaiin, oil palm chingtute fuihna thu a sawi a. Sawrkarin kut hna thawktute hmasawnna leh hamthatna tur ruahmanna hrang hrang a siam thin a, chu'ng ruahmanna tam tak chu a hlawhtlinna kut hna thawktute kutah a awm thu a sawi a. Kut hna thawktute'n an hma laknaah tih tak takna nena an beih a pawimawh thu leh tunlai thiamna te nen tang kawpa thar chhuah hlawk zawk nei turin mi thiamte rawn taimak a tul thu a sawi.

Block Agriculture Officer Pu H. Lalbiaknia chuan NMEO-OP hnuaia custom hiring centre din chungchang technical report a pe a. Pu C. Malsawma, Chamdur 'P' hnen atangin thu sawi ngaihthlak a ni bawk a. Lawngtlai DAO chuan CAOPGS te kutah tractor chabi hlanin, DAO office tual atangin tractor hi a vai liam nghal a ni.

Chamdur Area Oil Palm Growers' Society (CAOPGS) hnuaiah hian oil palm chingtu (farmer) 74 an awm a. An zavai hian oil palm rah (FFB) hunbi neiin an seng thei vek a. CAOPGS tan hian NMEO-OP 2022-2023 hnuaiah Custom Hiring Centre (CHC) din niin, CHC hnuaiah hian sawrkarin tractor leh hmanraw dang a pe a, he'ng tractor leh hmanraw dangte hi huan atanga a bukna hmun (collection centre) thlenga oil palm rah phurh chhuahna tur te, oil palm rah lawhna tur leh thil dangte a ni. Tractor leh hmanraw dang man hi sawrkarin 95% tumin, scheme-in a phut angin tractor leh hmanraw dang man atanga zaa panga (5%) chu farmer-te'n an tum ve thung a ni.

Vawiina Chamdur CHC tana tractor hlan hi Mahindra 35 HP niin, SR Agriculture Equipments siam trailer ton 5 hlan tel a ni bawk.