Vawiin khan Chanmari YMA Hall-ah  ni hnih awh tur State Medicinal Plants Board (SMPB) buatsaih ‘Training/Awareness cum Buyers/Sellers Meet’ hawnna hun neih a ni a. Health Minister Dr. R. Lalthangliana chu Khuallian niin he hun hi a hawng a. Health Minister hi State Medicinal Plants Board (SMPB) chairman a ni.

Minister Dr. R. Lalthangliana chuan AYUSH enkawlna hnuaiah State Medicinal Plants Board (SMPB) changtlung taka kalpui a ni chu lawmawm a tih thu a sawi a. Mizoram hi kan vannei hle a, kan ramah hian ramhnim damdawi tam tak awmin la hmuhchhuah loh pawh awm nual tura ngaih a ni, a ti a. Ramhnim damdawi kan neihte hi haichhuah a, tangkai taka hman a pawimawh hle a ni tiin kan ram hausakna kan hman thiam a tul a ni, a ti a. Kan pi leh pute pawhin ramhnim damdawi hi an lo hmang tangkai tawh thin a ni, a ti a. Ram changkang zawkin an damdawi siamna hmunpui (pharmaceutical industry) atana hmanraw hrang hrang an lakkhawm zinga tam tak chu ramngaw atanga lakchhuah a ni tiin hei hian vawiin programme pawimawhzia hi a tilang chiang hle a ni, a ti a. Kan ramah hian ramhnim damdawi hrang hrang 1200 vel awm anga hriat a ni a, an pawimawhna leh tangkaina zirchiang tura kan beih a ngai a ni tiin kalkhawmte chu a fuih a ni.      

Khualzahawm AYUSH Director leh SMPB Member Secretary Dr. F. Lallianhlira chuan thu sawiin AYUSH in medicinal plant chungchanga hma a lakna chuan rah tha a chhuah zel a, tun hun lawmawm tak hi kan thlen theih phah a ni, a ti a. Man tlawm leh side effect nei lo, ramhnim damdawi hrang hrang hi a lar chhoh zel kan beisei a ni tiin sawrkar laipui phei chuan a ngai pawimawh hle a ni, a ti a. Zawrhchhuahna lamah pawh hmasawnna a awm beisei a ni tiin hun tha tak hmang turin duhsakna a hlan a ni.  

State Medicinal Plants Board (SMPB) hi National Medicinal Plants Board hnuaiah kum 2001 khan din a ni a, kum 2015 atang khan AYUSH Department chuan a enkawl tan a. State hrang hranga ramhnim damdawi tichangtlung tura din a ni a. SMPB hmalakna leh hnathawhte chu : Ramchhung leh pawna ramhnim damdawi mamawh leh tharchhuah chungchang buaipui, ramhnim damdawi chin leh dahthat chungchanga zirtirna pek, state chhunga ramhnim damdawi venhim leh khuahkhirh leh ramhnim damdawi chingtute nena thawhho a ni. National AYUSH Mission hnuaia hmalakna thenkhat : Sihphir, Kawnpui, Serchhip leh North Vanlaiphaiah ramhnim damdawi chin niin Nghalchawm, Keifang, Thenzawl, Tuirial leh Department of Horticulture, Aromatic and Medicinal Plants (HAMP),MZU ah nursery siam a ni bawk.

Programme hi Dy. Director AYUSH, Dr. S. Mara Thansiami chuan kaihruaiin SMPB CEO Dr. Lalkhawngaihi Renthlei chuan kalkhawmte lawmna thu a sawi a. SMPB Consultant Dr. Lalchhanhimi chuan report a pe a. Dept of HAMP, Asst. Prof Pi Abigail Zothansiami chuan ramhnim damdawi pawimawhna a tarlang a. Prog. Officer Dr. T. Lalliankimi chuan lawmthu sawina in hun a khar a ni. Chawhnu lamah hian Dept of HAMP, Asst. Prof Pi Abigail Zothansiami leh RIPANS DBT-Biotech Hub Co-ordinator Pi K. Thanzami chuan ramhnim damdawi chindan leh an pawimawhna chungchangah mipui hrilhhriatna hun an nei a. Naktuk hian Dept of HAMP, Asst. Prof Dr. Chhungpuii Khawlhring leh Dr. Awadhesh Kumar chuan ramhnim damdawi enkawl dan leh zawrchhuahna chungchangah zirtirna an pe dawn a ni. Vawiin hian State Medicinal Body hnuaia Executive Member te  leh Technical Screening Committee te an tel a. Ramhnim damdawi chingtute leh zuartute bakah hemi lama mi thiamte an tel a ni.