No.2264/2021-2022

Aizawl, 17th September, 2021 : PM CARES hnuaia Mizoram sawrkarin a dawn 300 LPM Oxygen Plant, SRHF-ZMC a mi chu Health Minister Dr. R. Lalthangliana’n ribbon chep chatin a hawng.

Oxygen plant hawn puala inkhawm buatsaihah Health Minister Dr. R. Lalthangliana chuan ZMC in Oxygen Plant 200 LPM kan neih sa tangkai taka kan hman laiin a aia lian zawk PM CARES hnuaiah 300 LPM kan dawng a, hman theih tura kan hawng ta hi a lawmawm takzet a, COVID-19 hripui leng karah he hri kai damlo na zual ten oxygen an mamawhna a san belh nasa em em a, a hun takah Pathian remruatin kan mamawh phuhruk a ni, a ti a. Tunah hian PM CARES hnuaia kan dawn tho CPWD in an rawn bun 1000 LPM pawh reiloteah kan hawng thei tawh dawn a, oxygen chungchangah a thlamuanthlak a ni, a ti a. Mizoram District Hospital zawng zawngah Oxygen Plant hi dah tura ruahman a ni a, tunah hian Kolasib-a mi tur 250 LPM leh Mamit-a mi tur 500 LPM pawh Lengpui Airport-ah a rawn thleng tawh a, a khawl a rih tham deuh avangin Crane hmanga laksawn a ngai a, ISPAT Company ten kan ngen angin hma min laksak dawn a, a lawmawm takzet a ni a ti a. Synod Hospital, Durtlang leh Christian Hospital, Serkawna mi tur pawh CSR kaltlanga hmuh theih dan tur kan dap mek a ni, a ti bawk.

COVID-19 hripui leng hmachhawn kawngah damlo enkawltute an fakawm tih sawiin, kan mihringpui mangang leh harsatna tawk, hriselna tha lote nunna chhan tura thawktu an ni hi an hna a ripuiin a zahawm a ni,a ti a. COVID-19 hripui leng karah ngat phei chuan mahni nunna thapa thawh a ngai a, mihringpuite hmangaihna, lainatna leh duhsakna nena an thawk thei hi an chhuanawmin Mizoram mipuiten kan thlamuanpui che u a ni, a ti a. hun harsa kan hmachhawn karah hmasawnna duhawm kan hmu tyhin a, pathian kaihhruaina kan dawng nasa a ni tiin, NESIDS atangin ZMC Boys hostel leh Girls Hostel sakna tur cheng vaibelchhe 10 ve ve kan dawng leh dawn a ni, a ti bawk.

Minister in vawiina a hawn tak Oxygen Plant 300 LPM hi PM CARES Fund ( Citizen Assistance and Relief in Emergency Situation) atangin Covid 19 second wave dona atan June ni 18, 2021 khan Ministry of Health & Family Welfare atangin dawn a ni a. A khawl dahna tur in hi Mizoram sawrkarv sak tura tih niin cheng nuai 21 sengin kar 3 chhunga sak zawh a ni.

Oxygen Plant hi Central Medical services Society in a thlawnin an rawn bun a, July thla khan an engineer te lo kal in July ni 27, 2021 khan an rawn bun fel a ni.

He khawl hi Absstem Technologies, New Delhi te siam niin, a model hi MEDO 18 ani a. Minute khata oxygen a pek chhuah theih zat hi 300 litres niin darkar 24 chhungin 4,32,000 litres a pe chhuak thei a. A sample hi quality assessment lab FARELABS, Gurgaon ah ni August ni 24, 2021 khan thawn niin, a thianghlim zawng hi 94.13% tih hmuh a ni. Pressure hi 4.5 bar thleng a pe chhuak thei a, chumi chuan pipeline ah kal tirin lutin damlo ten an mamawh angin an khumah an lo la thei dawn a ni.

Tun dinhmunah damlote an serious in oxygen an mamawh zat hi a sang hle a. ZMC-in nikhata oxygen a mamawh zat hi mamawh zat hi litre nuai 12-13 vel ani a. Khawl neihsa 200 LPM hian nikhatah litre nuai 3 vel a pe chhuak ve a, a bak zawng hi chu nitin lei niin, a hautak duh hle thin a, oxygen man ringawtah nitin Rs 45,000 vel hman a ni a, thla khatah chuan Rs 13,50,000 vel a ni. Oxygen mamawhna hian san lam a la pan zel a, 300 LPM PSA hian nasa takina chhawk zangkhai thei dawn a. 300 LPM PSA hian oxygen hi nikhatah litre nuai 4 vel a pe chhuak thei dawn a,tuna ZMC in oxygen an hman dan chhutin 40 % vel lai an mamawh a phuhru tura ngaih a ni. A sum zawnga chantir chuan thla khatah Rs 5,40,000 vel an hum thei tawh dawn a ni.

Vawiina Oxygen Plant hawnna inkhawm hi Health Secretary Pu R. Lalramnghaka’n a kaihruai a, Dr. Micky Zodinpuia, Nodal Officer, Oxygen Plant-in technical report pe in, Dr. F. Lallianhlira, Principal Director, H&FW in lawmthu sawina hun a hmang a ni.