Vawiin chawhma khan I&PR Conference Hall ah Health Minister Pu Lal Thanzara chuan National Health Mission hnuaia hriselna kawnga mipui vantlang te hnena sawrkar in hna a thawh that dan te endik hna, Community monitoring chu Mizoram a hman tan ve turin a hawng a. A vawikhatna atan community monitoring bul tanna atan Serchhip district pilot project ah thlan ni in Zoram Entu Pawl in Monitoring hna hi an thawk dawn a ni. Launching Programme hi Health secretary Pi Esther lalruatkimi in a kaihruai a, he hunah hian mithiam ten Community Monitoring hna chung changah endiktu tura thlan te hnen ah zirtirna an pe chhunzawm nghal a ni.

Community Monitoring Launching Programme a thusawitu Health Minister Pu Lal Thanzara chuan National Rural Health Mission(NRHM) kal tlang in Mizoram pawh in tan ala nasa a, hriselna kawngah hma kan sawn tawh hle a ni a ti a. Community monitoring chuan sawrkar hmalakna ti chak zual sawt dawn bak ah Sawrkar neitu mipui ten neitu chan changa sawkar nasa zawka a puih theih dawn avangin a lawm awm hle a ni a ti.Monitoring hna thawktu tur te pawh an hnathawh a pawimawh zia hre reng chung in a chhelai siamtha tu,damdawi in a hnathawkte finchhuah a, mipui te harsatna hmuchhuak thiam thin tur leh hriselna chungchanga kawng kawhhmuhtu ni thei turin a chah a ni.Tun dinhmun ah Mizoram pumpui ah Accredited social Health Activist(ASHA) 987 an awm a,Village Health sanitation and nutrition committee(VHSNC) hmun 815 ah din ni tawh in Rogi Kalyan Samities or Patient welfare Committees (RKS) pawh damdawiin 77 ah din a ni tawh a ni a ti a. Mizoram sawrkar pawhin health sector ah chak leh zualin tan a la zel dawn a ni a ti.

Community Monitoring hawnna neih zawh ah hian Dr.Gordon Zohmingthanga, NRHM Mission Director, Dr. TC Hmingthangi, SNO leh Pu R.Lalmuankima, State Facilitator, RRC-NE leh AGCA Secretariat atanga lo kal Dr.Bijit Roy leh Dr.Rakhag Gaitonde ten community Monitoring a hnathawktu te hnenah zirtirna an pe a. Dr Lalrinliana Sailo, Principal Director, Health & Family Welfare Department, Dr.Lalbiakima, Director, Health & Medical education leh Dr.K.Ropari, Director, Health services te pawh Orientation workshop ah hian an tel ve a ni.