2601/2024-2025

Dated Aizawl, the 18th October 2024: Vawiin chawhma dar 11:00 khan, Trained Nurses' Association of India (TNAI), Mizoram branch chuan an pawl kum 60 tlin lawmna hun chu Synod Conference Centre, Sikulpuikawn, Aizawlah an hmang a. He hun hi Pi Lalrinpuii, Minister, Health & Family Welfare Department chuan khuallian niin a hmanpui a, Jubilee puala buatsaih Souvenir a tlangzarh nghal bawk a ni.

Khuallian Minister Pi Lalrinpuii chuan kalkhawmte hmaah hian fuihna thu sawiin, nurse te'n pawl huapzo tak an nei chu lawmawm a tih thu a sawi a. Nurse-te chu thlei bik nei lo leh mahni inphata rawng bawl thin an nih angin, an chanvo ropuizia chu ngaituah thin turin a chah a. An inlungrualna chu vawng nung zel tur leh hmasawn zel tura fuihin, Nurse-te chu Mizoram leh India ram pawn thleng pawha hnathawk tura thawn chhuah tlak (Export quality) nei tura tan la zel turin a fuih bawk a. Ruihhlo laka Mizoram chhan chhuak tura an dinhmun pawimawh zia ngaihtuah tura chahin, ram leh hnam, harsatna su kiang tura thawpuiah a sawm nghal bawk a ni.

He hunah hian Pi Cheryl Susan Tada, Vice President, North-East Region TNAI Hqrs. pawhin thu sawiin, Nurse-te chu inhlanna leh tumruhna nena an eizawnna kawng chu zawh turin a chah a. Hun kal tawh atanga inzir fo thin turte, an tun hun chu tangkai taka hmang turte leh hma lam huna beiseina sang tak nei thin turtein a chah bawk a ni.

Hun hman hi Pi K. Lalengkimi leh Pu Lalthakima te'n an kaihruai a. Pi Lalbiaksangi, ECM chuan hunserh hmangin, Prof. Lalfamkimi, President, TNAI Mizoram branch chuan kalkhawmte  lawmna thu a sawi a. Hemi zawh hian Nurse kalkhamte chuan an thutiam chham rualna neiin, senior member (kum sawmriat chin chung lam) te chawimawinain a chhunzawm a. Hemi hnu hian Pi Lalrimawii, Vice President, TNAI chuan Mizoram branch lo zik chhuah dan chanchin tawi sawiin, Pi Lalfakawmi Fanai, Secretary, TNAI, Mizoram branch-in report kimchang a pe a ni.

TNAI Mizoram btranch hi kum 1964 khan din niin, kumin hi an kum 60 tlinna a ni a. Tun dinhmunah hian TNAI life member 4053 awmin, Mizoram branch bik hnuaiah hian member 2751 an awm mek a. District branch 10 awmin, Mizoram pumah Nurse zirna in 17 a awm mek bawk a ni.