2602/2024-2025
Aizawl Dated the 18th October, 2024 : Mizorama Primary School leh Middle School-a chawchhun sem thin chu hun rei fe tluang taka kalpui a nih reng laiin tun hnaiah Fund chungchangah Department lamin harsatna a tawh avangin duh angin pawisa pek chhuah zung zung tur a awm lo a, School lama kan thawhpuiten he harsatna avanga chawchhun an sem thin dt. 18.10.2024 atanga an chhunzawm theih tawh loh tur thu an rawn thlen hi an dinhmun kan hriatthiampuiin pawi kan ti hle a ni.
An harsatna ber chawhmeh man (Material Cost) hi kumin January thla atanga tun thlenga pek chhuah a nih loh vang a ni ber a, Cook-cum-Helper hlawh pawh thla 4 lai chu pek a ni tawh lo a, pawi kan ti hle a. Sawrkar thar hian Cook-cum-Helper te dinhmun hria in, thlakhata Rs. 1500 an hlawh thin chu Rs. 3000-ah tih san a ni a, heng hlawh thar ang hian April leh May thla hi pek ani tawh a ni.
Hetianga harsatna a thlen nachhan ber hi Fund pek chhuah dan system thar PFMS (Public Financial Management System) hman a ni a, chumi hnuaiah chuan SLS (State Link Scheme) awm lehin Account pathum hawn a ni a, chu chu a hran theuhin Finance Department, PFMS leh State Treasury leh Central lama PFMS te nen inthlunzawm vek a ngai a, hemi buaipui chhung hi hun a heh em vang a ni ber. Tin, PFMS hi thil thar a la nih avangin State PFMS-a thawktute nen inbe rawnin inhai kuak chawp zel a lo ngai a, heng zawng zawngte zawh a nih hnuah Central Assistance dilna hi thehluh theih a ni chauh a, kum 2023-24 atana 1st Installment chu October thla laihawl velah hmuh theih chauh a ni.
Tin, PFMS hi langtlang taka kalpui a nih avangin kan fund kal dan hi Central lama miten an rawn hmu vek thei tawh a, kan fund neih zawng zawng atanga 75% tal kan hman zawh loh chuan Installment dang dil theih a ni lo. Chuvangin Central-in fund a rawn release veleh theih tawpa umzui a ni chung pawhin duh angin hmalak chak a har em em a, hetianga thil tih zung zung theih loh a nih dan hi School-a kan thawhpui zirtirtute leh Zoram mipuiten min hriatthiampui a tul hle a ni.
Mizoram sawrkarin naupang chawchhun hi a ngai pawimawh em avang hian, State Share pawh advance-in Rs. 484.29 lakhs chu ni 18.10.2024 hian an sanction tawh a ni. Central lamah pawh lam kal intirin bawhzui nghal turin Department in hma a la nghal a, rei loteah chinfel thuai beisei a ni. Thawktu zawng zawngten naupangte dinhmun hre renga mahni zawn theuha tlawmngaih chhuaha a theih ang anga thahnemngai taka hma la chhunzawm zel turin kan inngen tak meuh a ni.
