Naute hnute pek pawimawhzia inhrilhhriat nana khawvel huap World Alliance for Breast Feeding Action (WABA)-in kum 1992 atanga World Breast Feeding Week kum tina ni 1-7 August chhunga hman tura a puan chu vawiin khan khawvel ram hrang 170 chuangin an hman rualin Mizoram ah Health Minister Pu Lal Thanzara’n Aizawl ah a hawng.

World Breast Feeding Week hawnna hi Aizawl Civil Hospital Conference Hall (Block I) ah hman a ni a, Minister chuan Week hawnna thu sawiin khawvel hmasawnna-in a ken tel - hmeichhe hnathawka chhuak pung zel ah, nu hnathawk te tan, hnathawk chunga naute hnute an pek chhunzawm zel theihna tura hmalak leh ruahmanna siamsak chu sawrkar, khawtlang leh chhungkua te mawhphurhna a ni a ti. Kumin World Breast Feeding Week thupui atana thlan - ‘Breast Feeding and Work : Let’s make it work’ chuan a tum chu nu tam tak hnathawh ngai te, an hnathawh avanga naute hnute pek chhunzawm thei lova, bawnghnute leh hnute siamchawp dangte an pek thin avanga naute ah hrisel lohna tam tak thlenin, nausen thihna ti tam tu, IMR tisangtu a nih fo thin avangin, hnathawk chung pawha Nu hnute ngei pek theih a pawimawh tih hi a ni, a ti. Nau hnute pek hlawhtling taka kalpui a nih theih nan a tul anga zirtira kaihruai turin Aizawl Civil Hospital ah Lactation Counsellor pahnih an awm thu sawiin rah tha tak a chhuah mek dan te a tarlang bawk. Nu hnute tui chu naute tana chaw tha ber, natna laka vengtu, nau than tithatu, nu leh naute tana hlawkpuiawm ve ve a nih thu te a sawi lang bawk. Nausen laia thi tihtlem nan hnute pek pawimawhna te sawiin Minister chuan uar zawka kan inzirtir chhawn zel a pawimawh tak zet a ni a ti bawk. Sawrkar Damdawiin tihchangtlun nan Aizawl Civil Hospital leh Lunglei Civil Hospital-a dah tur Dialysis khawl thar lei thuai tum a nih thu a puang bawk.

Vawiina World Breast Feeding Week hawnna inkhawm hi Hospital & Medical Education Director Dr Lalbiakkima’n a kaihruai a, Dr K.Ropari, Principal Director, Health & Family Welfare Department, Dr Lalmalsawmi Hmar, HoD, Paediatrics Dept. leh Dr Lalhmuchhuaka, Deputy Medical Superintendent, Kulikawn Hospital ten nau hnute pek chungchanga hriat tur pawimawh tak tak te an sawifiahin sawihona te hman a ni bawk. World Breast Feeding Week hawnna hi Kohhran pawl hrang hrang hmeichhia te leh tlawmngai pawl hrang hrang ten an hmanpui bawk a ni.

Health Minister hian Aizawl Civil Hospital-a Opioid Substitution Therapy (OST) Centre, Thisen endikna Laboratory, OPD department hrang hrang, Eye Bank, Dental Ward building thar, Ayush OPD & Dispensary, Nau pai thisen test-na PPTCTC, X-Ray room tui far, Lift siamthat leh hmun dangte a tlawh kual nghal bawk a ni.