3254/2023-2024

Aizawl, the 6th January, 2024: Health & Family Welfare (H&FW) Minister Pi Lalrinpuii chuan vawiin khan Zoram Medical College (ZMC), Falkawn leh Mizoram Nursing College (MCON), Falkawn te a tlawh. Health Minister hi Pu H. Ginzalala, MLA, Adviser to Chief Minister (Technical) in a tawiawm a ni.

Health Minister Pi Lalrinpuii chuan PMJVK scheme hnuaiah health sector lam tihhmasawn chu sawrkarin ngaih pawimawh a tum thu sawiin, hemi kaltlang hian hriselna kawngah hmasawnna nasa tak neih theih a beisei thu a sawi a. Thawktute hmalakna fakawm tiin, theihtawp chhuah chhunzawm zel turin a fuih nghal bawk.

Minister tawiawmtu Pu H. Ginzalala, MLA, Adviser to Chief Minister (Technical) chuan tun dinhmunah ZMC ah OPD a inentir an la tlem deuh avangin mipui buaina ber electric vehicle-te service theih dan tur sawrkarin a ngaihtuah mek thu a sawi bawk.

Dr. Jane R. Ralte, Registrar, Zoram Medical College-in ZMC chungchang PowerPoint presentation hmangin a sawifiah a. ZMC in hlawhtlinna a chan hrang hrangte, hmabak leh harsatna neih hrang hrangte a tarlang a. ZMC pantu damlo za zela 70 chuangte chu mirethei AB-PMJAY scheme hnuaia inziaklut an nih thu leh, thingtlang lama mirethei leh khawsak harsa zawkte pankhawm an nih thu sawiin, tun dinhmunah thawktu indaihlohna nasa tak an tawh dante a tarlang bawk.

Minister Pi Lalrinpuii hi Pu John Zohmingthanga, Director, ZMC leh a thawhpuite bakah Pi Lalmalsawmi Sailo, Director, DHME, Dr. Ngurchamliana, Addl. Director, DHME leh Pu Zothanmawia Khiangte, Deputy Secretary, H&FW Department te'n an lo dawngsawng a ni.

Vawiin vek hian Health Minister chuan Mizoram College of Nursing (MCON), Falkawn a tlawh nghal bawk a, Minister hi MCON Principal Pi Lalchhanhimi leh a thawhpuite'n an lo dawngsawng a. Mizoram College of Nursing hnuaia hmalakna, hmasawnna leh hmachhawp an neihte Minister hnenah hian an lo thlen a. Staff quarters, lirthei leh Guest Lecturer indaihlohna chungchang an lo thlen bakah Champhaia Nursing School din chhoh mek chungchang pawh sawiho a ni.

Health Minister chuan hostel sak mek chu chak zawka hmalak a nih theih nan theihtawp chhuahpui a tum thu sawiin, NAAC ranking tha zawk nei thei tura tan la lehzual turin thawktute a fuih nghal a. Nursing School leh MYC te tangkawp kaltlanga foreign lama inhlawh tur tam zawk chherchhuah theihna tura hmalak tlan dan ngaihtuah a tul thu a sawi bawk.