Vawiin chawhma khan Chanmari Y.M.A. Hall-ah Health Minister Pu Lal Thanzara chuan School Education Department, Mission XI Million leh Mizoram Football Association(MFA) tangkawp ten an buatsaih, Sikul naupang zinga Football thiamna zirtirna chungchang, "Workshop on Mission XI Million" a hawng.

Mission XI Million hi India in kumin chhunga FIFA U-17 World CUP a thlenna tur lo inpuahchahna kawng khat leh urlawkna a nih piahlamah football tihhmasawnna kawng atana hmalakna pawimawh tak a ni a. He hmalakna, Ministry of Youth Affairs & Sports in Federation Internationale de Football Association(FIFA) leh All India Federation(AIFF) a thawhpuinaah hian a tlemberah sikul naupang maktaduai 11 tal, football thiamna leh ngainatna, FIFA U-17 World Cup, India in a thlen hma ngeia pek chu a thil tum a ni.

Zirtirtu te tana Mission XI Million zirchianna hun hawngtu, Pu Lal Thanzara, Health Minister leh President, MFA nihna chelhtu chuan infiamna khawvelah Mizoram in hma a sawn nasa tih a sawi a. Sawrkar thawhrimna-rah lo par chhuahna nia sawiin thalaite hmakhua ngaia khelmual tha leh infiamna hmun changtlung a siambelh zel anih piahlamah Mizoram chhunga infiami inzawmkhawmna pawl hrang te pawhin hma an sawn chhoh zel avanga he hlawhtlinna hi lo awm a nih thu a tarlang.

Pu Lal Thanzara chuan Prime Minister in 'Maan ki Baat' ah a lo sawitawh anga naupang maktaduai 11 tal hnena football thiamna pek tuma hmalakna a lo awm ta chu lawmawm a tih thu a sawi a. Mission XI Million chu Mizoram chhunga naupangte tan leh football tan hmasawnna a nih ngei a beisei tih a sawi. Football chu eizawnna tlak a nih thu tarling tundinhmunah I League ah Mizoram in Football khelthiam thawhhnem ber tawhin Mizo player 55 in India football league ngaihhlut berah an khelmek a ti a. FIFA Under 17 World Cup atana India Team-ah Mizo rawlthar pahnih in training an neih mek tih tarlangin Mizo thlalai te tan infiamna khawvel ah hmalamhun lawmawm tak tak beisei tur tamtak a awm mek a ni a ti.

Workshop on Mission XI Million hawnna hi Pu S.T.Zaduna, Joint Director, School Education in a kaihruaia. He hunah hian Middle School leh High School Headmaster te leh zirtirtute'n Pi Sonia Minocha, Head, Mission XI Million hnen atangin zirlaite hnena football tihhmasawn dantur bakah Mission XI Million nena thawhhona kalpui dan tur an zir a. Mission XI Million hmalaknaah hian India ram khawpui lian tak tak zingah khawpui 31 chiah thlanchhuah niin Aizawl pawh heng khawpui zingah hian thlan tel a ni.