No.1963/2021-2022
Aizawl 23rd August 2021: Vawiin khan Health Minister Dr. R.Lalthangliana leh Information & Public Relations Minister Pu Lalruatkima ten Aizawl chhunga Covid-19 Test Kiosk hmun pathum- Vanapa Hall-a Mega Kiosk; Dinthar Kiosk leh Electric Veng Kiosk te a hmunah tlawhin, thawktute hnenah lawmthu sawina an nei.

Health Minister Dr. R.Lalthangliana chuan fimkhur chhunzawm zel a pawimawhzia sawiin, mahni fimkhur thiam a, pawn leh midang bula awm tam loh leh CAB ngai pawimawh hram hram turin mipuite a chah a. Aizawl lun lai taka Mega Kiosk-Vanapa Hall, Tuikual South enkawltu leh thawktute inpekna chu fakawm tiin, anni lo buaipui a, hun leh tha tam tak sengtu- Tuikual South LLTF te chungah lawmthu a sawi bawk a, mipui mamawh tuten tangkai taka an hman tur Sample Booth pathum an hlan (donate) chu fakawm a tih thu a sawi bawk a ni. Kohhran hrang hrang, tlawmngai pawl leh mimal bakah department hrang hrang ten sawrkar an thlawpna-ah leh a tul ang chanvo an neih te tlin taka an tih zel avangin lawmthu a sawi bawk a ni.

Information & Public Relations Minister Pu Lalruatkima pawhin thu sawiin hripui leng chu mipui tanrualna azarah hneh a nih ngei a rin thu a sawi a, mipui thuawihna te fakawm tiin, VLTF leh LLTF te tana hnawksak leh thuawih lo fal an awm lo niin a lang a ti a. Hun harsa tak karah thingtlang atangin Aizawl mipuite eitur thlai thar hrang hrang thawn a ni reng te chu lawmawm a tiin, thingtlang loneitute inpekna chu fakawm a ti tak zet bawk a ni.

Mega-Kiosk, Vanapa Hall-ah hian Fluorescent Immunoassays (FIA) dah a ni a, test man hi Rs 300 niin, nitin chawhruala lakin sample 70 lak thin a ni a, FIA hi accuracy, specificity, sensitivity tha tak a ni bawk a. Standard leh Real Mode a hman theih a ni a, Real Mode hian darkar khat chhungin sample 60 test theih a ni a, standard mode hian vawi khatah sample 15 test theih a ni bawk a ni.

Dinthar Kiosk hi vantlang kiosk hmasa ber a ni a, tun dinhmunah hian nitin 50 atanga 100 inkar sample lak thin a ni a, veng thenawm leh a bikin Aizawl West huamchhung-a mipuiten an hman tangkai hle a. Dinthar vengchhung-ah hian 4C paruk awmin, tun dinhmunah hian pali a ruak a, active case 41 an awm mek a, covid-19 first wave-ah mi pakhat a thi a, second wave-ah hian mi pahnih an thi tawh a, damchhuak mi 1081 an awm a ni.

Electric Veng Kiosk hi community kiosk, mahni intuamhlawm leh intum awm chhun a ni a, nitin sample 50 vel lak a ni thin a, vengchhung bakah veng thenawm ten an hmang tangkai hle a . Electric Veng-ah hian 4C pahnih awm in, active case 82 an awm mek a ni.