362/2023-2024

Aizawl the 8th May 2023: Health Minister Dr. R. Lalthangliana hovin Medical Association hrang hrang - Indian Medical Association, Mizoram Government Doctors Association leh Non-Government Hospital Association of Mizoram hotute chu vawiin khan Health Minister pisa-ah inkawmhona an nei.

Tualchhung buaina avanga Mizoram mi leh sa Manipur-a tangkhang mek te, Manipur-a Zohnahthlak awmte leh sahimna zawnga lo tlante dinhmun ngaihtuah a inkawmhonaah hian Health Minister chuan sahimna zawnga rawn tlante chu kawng engkimah chhawmdawl zel an nih tur thu a sawi a, Mizoram Doctor ten Churachandpur Civil Hospital tanpuina tura cheng nuai 7 chuang an thawhkhawm chu ropui tiin entawntlak a ti hle a, nimin lamah damdawi tam tham tak vailiam a nih thu tarlangin tun ang boruakah, tangkhang leh hliamte ngaihsak leh ngaih pawimawhna lantir zel a nih chu lawmawm a tih thu a sawi. Minister chuan Churachandpur Medical Superintendent leh Doctor dangte nen an inbiak thu sawiin tun dinhmunah harsatna an tawk lem lo a ti a, Mizoram atanga damdawi thawn chungchangah lawmthu an sawi thu a tarlang bawk.

Health Minister Dr. R.Lalthangliana chuan Manipur Addl. Chief Secretary nena an inbiaknaah boruak muanawm a awm vat theih nan theihtawp chhuaha tan tlan a tul thu an sawidun a ni tih a sawi a. Manipur-a Mizo zirlai naupang leh hnathawka awmte chu Mizorama hruai haw mek an ni a ti a, reiloteah hruai haw kim thuai an nih tur thu a sawi.

Vawiina inkawmhonaah hian Mizoram mi leh sa hruai haw chungchang te, a tul anga chhawmdawl hnathawh dan tur te, Mizoram-a Meitei lehkha zir leh hna thawka awmte himna tur sawiho a ni a. Manipur leh Mizoram ramria khua awmte thawmthat leh mamawh chakkhai lam kawngah harsatna an tawh loh nana hmalak dan turte an rel bawk. Heng bakah hian India ram chhunga nurse hnathawk tha bikte hnena hlan thin ‘Florence Nightingale Award’, Mizoram Nurse-te atanga dawng pha chinte chawimawi dan tur chungchang an rel bawk a ni.