2622/2026-2027

12th October, 2026: Tun hma atanga Mizote damdawi in pan nasat leh rin, natna khirh zualah phei chuan India rama damdawi in tha leh rintlak ber zinga mi - Christian Medical College (CMC), Vellore chuan vawiin atang hian MUHCS an zawm ve ta a. Health Minister Pi Lalrinpuii hoin, CMC Vellore hotute leh Health Official ten vawiin khan Memorundum of Understanding an sign a ni.

Nikum lam MUHCS 1.0 atang khan CMC Vellore hi empanel tuma vawi tam tak dawr an ni thin a. Re-imbursement system lo chuan an kal theihloh thu chauh chhanna dawn a ni thin a. Hetiang chung hian Health Minister chuan theihtawp chhuahin kalphung thar sawrkar hnuaia MUHCS chu rintlak leh innghahna tlak, State pawna Private Hospital dangte pawhin vawiin thlenga harsatna an neihloh thute sawipuiin, mipuite tana theihtawpa he health care scheme hi a kalpui tlat avang leh bill pekchhuah chungchangah pawh harsatna a awmloh thute a hrilhfiah hnuah inbiakna kalpui chhunzawm leh theih a ni ta a. Damlo, a bikin natna khirh bik leh damdawiin lian mamawh te tana tangkai taka cashless a an in enkawl zui theihna tura inremna ziah chu an lo remti thei ta a ni.

CMC Vellore hotute chuan Mizoram Health Care Scheme chu tha an tih thu sawiin, Sawrkar hnathawk mai ni lo, mi rethei berte thleng phak Health Care Scheme a nih avangin theihtawp chhuaha thawhho an duh thu an lo sawi a. Mizoram Sawrkarin tih tak zeta a dawr chu lawmawm an tih thu sawiin, Draft MOU pawh darkar 48 chhungin an lo pawm thu leh, MOU an buaipui tawh zawng zawnga an pawm ran ber anih thu te an lo sawi a. Christian Missionary te bul tan, Mission mode a kal a nih avangin damlo tanpui ngaite ta chuan theihtawp an chhuah reng thin thu an sawi a, Chennai Airport atanga darkar 2 lekah a thlen theih tawh avangin connectivity ah pawh harsatna a ziaawm tak thu an sawi bawk.

Health Minister - Pi Lalrinpuii chuan thusawiin, damdawiin hrang hrangte zingah an rate chu a tlawmfal an tih thu sawiin, damlo enkawlna rate hrang hrang pawh Hospital dang ngaihtuaha man tlawm taka kalpui theih a ni tur chu Mizoram mipuite tan a tangkaiin, Sawrkar tan pawh a lawmawm hle dawn thu a sawi bawk.

He MOU hi Health Minister Pi Lalrinpuii kaihhruaina hnuaiah Pi Lalzarmawii, IAS, Commissioner & Secretary; Pu H. Lalhruaitluanga, Under Secretary, Health & Family Welfare Department leh Dr. Lalbeiseia Renthlei, Programme Manager, MSHCS ten Sawrkar aiawhin an hming an ziak a. CMC Vellore atangin Dr Biju George, Director; Dr Rajesh I, Medical Superintendent leh Dr Selvamani B, Associate Director(Finance) ten an sign a ni.

He MOU sign-naah hian Health Department Official te bakah Rev Lalthanzuala, Chaplain, CMC Vellore chuan Health Minister hi a tawiawm a ni.