2455/2026-2027 

Health Minister Pi Lalrinpuii hovin vawiin khan Mizoram State Medicinal Plant Board (SMPB) chuan Aijal Club-ah an din champhaphak vawi 25-na silver jubilee an lawm.

SMPB Mizoram Executive Body Chairman ni bawk Health Minister Pi Lalrinpuii chuan State Medicinal Plant Board-in kum 25 hmel a lo hmu ta chu lawmawm a tih thu sawiin Mizoram chhunga ramhmul damdawi humhalhna kawngah te, a chin leh enkawl zui chungchangah te, ramhmul damdawi zirchianna leh a ṭangkaizia chawi larna kawngah leh farmer te tana eizawnna siamsak kawnga an hmalakna te chhuanawm a tih thu a sawi.

Mizoram District pali (4)-a School 52 ah Herbal Garden an siam thu sawiin Health Minister chuan Khawthlir Tlang, N. Lunglenga Herbal Garden siamna tur ruahmanna awm mek pawh State mai bakah India rama chhuanawm ber pawl a nih theih a beisei tih a sawi a. February 2026-a National Medicinal Plants Board buatsaih Chintan Shivir on Medicinal Plants-ah Mizoram chu rampum huapa hma la ṭha ber pathumnaa puan a ni a; thawktute thawhrimna leh inpeknaah Health Minister chuan lawmthu a sawi a ni.

Pi Lalrinpuii chuan "Forward and Backward linkage in supply chain of medicinal plants - Integrated component" Project hnuaiah, Serchhip District-a Hrangturzo FPC loneitute tan eizawnna nghet siamsak an ni, a ti a. Curcuma zedoaria (Aichhia), Emblica officinalis (Sunhlu), leh Homalomena aromatica (Anchiri)—damdawi industry leh a danga hlutna sang tak tak neite chingin hma an sawn mek a ni, a ti. Health Minister chuan Mizoram leilung hausakna (bio-diversity) hi kan economy chakna hnar a ni, tiin, Serchhip District N.Vanlaiphai khua leh a chhehvela supply chain integration Project

kalpui mek hian kan leilung hausakna hi kan ram loneitute tan eizawnna nghetah a chantir thei a ni tih a lantir, a ti bawk.

He hunah hian Pi Lalrinpuii chuan 'Medicinal Plants of Mizoram' tih lehkhabu a tlangzarh nghal a. SMPB hmalakna pawimawh tak he lehkhabu tlangzarh tak hi Mizoram District 6-a tualṭo ramhmul damdawi zirchianna bu niin  Minister chuan “He lehkhabu hi lehkhabu satliah a nilova; kan tualchhung hriatna, scientific taka chhinchhiahna leh ṭhangtharte leh zirchianna beitute tana ro hlu tak a ni” a ti.

Health & Family Welfare Department Commissioner & Secretary Pi Lalzarmawii, IAS, SMPB Vice Chairman ni bawk chuan kalkhawmte lawmna thu a sawi a. SMPB Programme Officer Dr T.Lalliankimi chuan State Medicindal Plants Board hmalakna leh an hnathawh chi hrang hrang a sawi a. Mizoram State Medicinal Plant Board CEO Dr. Lalkhawngaihi Renthlei chuan ‘Medicinl Plants of Mizoram’ tih lehkhabu thlirlawkna hun a hmang a. Mizoram SMPB hi Ministry of AYUSH, National Medicinal Plants Board hnuaia awm niin vawiin programme-ah hian CEO Prof. (Dr) Mahesh Kumar Dadhich video message thlirho a ni a. Dr. Lalthlengliani, Director, Directorate of AYUSH & Member Secretary, Executive Body, SMPB chuan lawmthu sawiin chawhma hun hi a khar a ni.

Silver Jubilee lawmna programme hi session hniha ṭhen niin session hmasa neih zawh hnu hian Health Minister Pi Lalrinpuii hovin kalkhawmten medicinal plant stall hrang hrang leh thlalak phochhuahte a tlawhkual a. Session 2-naah "National Symposium on Medicinal Plants" neih chhunzawm niin RIPANS, Mizoram University (MZU), Environment, Forests & Climate Change (EF&CC) Department leh tualchhung entrepreneur-te chuan ramhmul damdawi phytochemical research, biodiversity conservation, IPR issues leh entrepreneurship chungchangah kalkhawmte an zirtir a. Prof. H. Lalramnghinglova(Retd.), MZU chuan he symposium hi a kaihruai a ni.

Silver Jubilee lawmna inkhawmah hian Health Department, Horticulture, Agriculture, School Education, KVKs, EF&CC, Commerce & Industries Department aiawhte, Expert Committee members-te, MZU leh RIPANS atanga research scholars leh zirlai te, tlawmngai pawl aiawh te, entrepreneurs leh AYUSH doctor thahnem tak an tel a ni.