2458/2026-2027 

Aizawl, the 1st October, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Pachhunga University College (PUC) buatsaih 5th College Cultural Day, College tualzawla buatsaih chu Khuallian niin a hmanpui. Higher & Technical Education Minister Dr. Vanlalthlana leh Power & Electricity Minister Pu F. Rodingliana te chu Khualzahawm niin, Prof. Dibakar Chandra Deka, Vice Chancellor, Mizoram University (MZU) chu Khualtha a ni. 

Larsap General (Dr) Vijay Kumar Singh chuan Cultural Day chu mahni nihna hriatchianna leh chhuang taka lantirna hun a ni tih sawiin, hnam ziarang leh nunphung hi hnam leh  khawtlang min phuar khawm tlattu a ni a, thangthar ten an hriat thiama, an ngaihhluta an chhawmnung chauhin a dai lo ang a ti. Mizo hnam ziarang leh nunphung chu Tlawmngaihna, midang chunga thatna, huaisenna, aia upa zah leh khawtlang inlungrualnaah a hausa hle tih sawiin, thalaite chu Mizoram ralmuanna, ziak leh chhiar thiam tamna bakah hnam ziarang leh leilung pianken hausa takte veng thaa tangkai taka hmang turin a chah a ni. 

Larsap chuan sawi chhunzawmin India ramin tunlai thiamna leh thil thar thlen kawngah hmasawnna chak taka a kalpui thu sawiin, mahni hnam tobul hloh chuang lova hmalam pan hi hmasawnna awmze nei a ni a ti. Thalaite chu zirna, tunlai khawvel thiamna leh remchanna chhawr tangkai chung zela mahni hnam ziarang leh nunphung hluta vawnghim tlat turin a fuih a ni.

Higher Technical Education Minister Dr. Vanlalthlana chuan hnam ziarang vawnghima nunpui tlat chu mihring ropui chher chhuah nana pawimawh a nih bakah zirna in  inghahna nghet siam nana pawimawh a ni a ti a. Silhfen inbel hmang ringawta hnam ziarang pholan a tawk lo tih sawiin, thalaite chu Aia upa zahna leh Tlawmngaihna te chu hnam incheina an hak rualin an thinlungah vawng tel turin a chah a. An kalna apiangah Mizo hnam ziarang leh nunphung zahpui lova midangte hmuh theiha pholangtu nih tum turin a fuih bawk.

P&E Minister Mr. F. Rodingliana chuan thalaite nena cultural day hman chu nuam a tih thu sawiin, Mizo hnam ziarang leh nunphung hi kan chhawmnun zel a pawimawh a, kan danglam bikna, chhiatni thatnia kan intawiawm thinnate hi kan thlahthlam tur a ni lo a ti. Thiamna leh finna zawn rualin chhungkaw din pawh ngaih pawimawh tel a tul thu a sawi bawk a. Thalaite chu ngaihtuahna dik neia ngaihsan tur dik tak ngaihsanna chang hre tura chahin, Mizoram tana ngaihtuah tha leh danglam bik nei tur leh rohlu siam chhuah tum turin a fuih a ni. 

He hunah hian Prof. Dibakar Chandra Deka, Vice Chancellor, Mizoram University chuan kalkhawmte lawmna thu a sawi a. Laisuih Award 2026 chu RINI Speech AI duang chhuaktu leh PUC chhuak Pu Zoramthanga hnenah hlan niin a aiawhin a nupui Dr. Maria Sailo in Larsap kut atangin a dawng a. Kalkhawm ten tharum thawhnaa inhnamhnawih lo tura intiamna an sawi rual a. Prof. H. Lalthanzara, Principal, PUC-in souvenir a tlangzarh hnuah lawmthu sawiin hun hman a khar a ni. 

Chawhnu lamah cultural programme hi hman chhunzawm niin cultural item hrang hrang - hnam lam leh zai, rimawi, drama, cosplay, India ram chhung leh pawn hnam thuam pholanna mawi leh hmuhnawm tak tak zirlai ten an entir a ni. 

Pachhunga University College hi Mizoram University hnuaia college peng pakhat niin, NAAC Accredited 'A+' Grade leh NIRF 2025 hnuaia 49-na dinhmun luah mek a ni.