Health Minister Pi Lalrinpuii'n Lunglei Municipal Council (LMC) hmunpui tlawhin, LMC hotute a kawm
2015/2024-2025
2024 Mimkut thla ni 11: Vawiin tlai dar 4 khan Mizoram Sawrkara Health & Family Welfare Minister Pi Lalrinpuii chuan Lunglei Municipal Council (LMC) hmunpui a tlawh a, Board of Council Hall, Convention Centre-ah councillor-te nen an inkawm.
Health Minister Pi Lalrinpuii hi Lunglei South bialtu MLA Pu Lalramliana Papuia leh Lunglei West bialtu MLA Pu T. Lalhlimpuia te'n an ṭawiawm a. LMC Chairman Pu Lalzuithanga hovin LMC councillor-te'n lo dawngsawngin, LMC hma lakna hrang hrang an lo sawipui bakah, harsatna leh mamawh an neihte a hnenah hian an lo thlen a ni.
Health Minister Pi Lalrinpuii chuan LMC hma lakna chu lawmawm a tih thu sawiin, hmachhawp an neih sawrkara bawhzui ngaite pawh theih tawp chuaha a bawhzuipui tur thu a sawi a. Lunglei khawpui hmasawnna tura ngaituahna seng a, hmathlir thui tak neia project ṭha tak tak duang chhuak turin councillor-te chu a chah a ni.
Minister leh MLA-te leh LMC Councillor-te inkawm khawmna hi LMC Chairman Pu Lalzuithanga chuan kaihruaiin, Minister-in LMC a tlawh avang leh inkawmna hun a siamsak avangin Councillor-te leh LMC staff-te ai awhin lawm thu a sawi a. LMC inrelbawl dan te, hma an lo lak tawhna leh hmachhawp an neihte tar langin, LMC-a thawktu indaih lohna awm leh post awm sa hnawh khah chungchanga an harsatnate a tar lang a. Saikuti Hall enkawlna chungchang bakah, Super Market leh Multi Car Parking neih theih dan tur te ngaihtuahpui turin Minister hi a ngen nghal bawk a ni.
LMC Vice Chairman Pu K. Lalrinawma chuan lirthei tlan dan leh hun dan ruahmanna (traffic management) kawnga an hma lak dan sawiin, veng chhung kawng (internal road)-a lirthei hun man (parking fee) lak chungchangah LMC leh Local Council te'n thawh dunna thuthlung an ziah thu a tar lang a. He ruahmanna hi September ni 25, 2024 aṭanga kalpui tura tih a nih thu sawiin, bawlhhlawh sawngbawlna (solid waste management) lama an hma lakna leh harsatna an tawhte a tar lang bawk.
Executive Councillor Pu Zorinsanga Hmar chuan Finance leh Technical lama staff indaih lohna vanga harsatna an tawh thu sawiin, faina leh thianghlimna (sanitation) chungchangah khawpui chhunga veng 6-ah bawlhhlawh khawn ṭha taka kalpui mek a nih thu leh khawpui fai inelna buatsaih a nih thu te a tar lang a. Poperty Tax lak dan chungchangah survey kalpui mek a nih thu leh civil work lamah pawh hma lak a nih thu te a tar lang bawk.
Executive Councillor Pi Lalhruaitluangi Sailo chuan LMC area chhunga dawr hawn phalna (shop licensing), thuziak leh milem hmanga infak mawina (advertising & hoarding), ran khuahkhirhna (control of animal), khawpui chei mawina (town beautification), khawpui chhunga thing phun (urban forestry) leh piang leh thi chhinchhiahna (birth & death registration) chungchanga an hma lakna leh harsatna an neihte a tar lang bawk.
He hunah hian LMC hma lakna thlir ho a nih bakah, hmabak leh hmachhawp awmte tihhlawhtlin a nih theih nana hma lak dan tur leh LMC hma lakna atana thil pawimawh hrang hrangte sawi ho a ni bawk.
