2016/2024-2025
Aizawl the 11th September, 2024 : Land Revenue & Settlement Minister Pu B. Lalchhanzova chuan Directorate of Land Revenue & Settlement leh Settlement Officer (Aizawl) office te chu zanin hian a tlawh. 

Aizawl Revenue District hmun hnih : Aizawl South leh Aizawl North a ṭhen tura July ni 25, 2024 a order chhuak tawh bawhzuiin LR&S department a thawk tute hi August ni 12 aṭang khan zan lamah overtime in an thawk ṭhin a. Aizawl-ah Settlement Office pahnih a awm tawh dawn avanga Land record leh a kaihhnawih hrang hrang te chinfel leh thliar hna hi zan lamah leh pisa chawlhah te an thawk ṭhin a ni. General register tun hmaa a kum bi a vawn ṭhin chu Veng leh Khua a thliar vek a ṭul tak avangin department a thawktute hian hei hi rim takin an buapui mek a ni. 

Minister Pu B Lalchhanzova chuan thawktute thawhrimna leh ṭhahnemngaihna chu chhuanawm a tih thu sawiin chhun lamah nilenga mipui nen an indawr tawh hnua zan lam leh Inrinni bakah pisa chawlhah te rim taka sawrkar ruahmanna tih hlawhtling tura hma an lakna ah LR&S department-a officer leh staff te inpekna chu ropui a tih thu a sawi. Minister hian Land record leh land administration ah Central sawrkar leh state upa zawk ten technology thar nena hma thui tak an lak tawh chu umphak tumin theihtawp chhuah a ṭul thu sawiin SASCI hnuaia tih tur min bituk te chu hun tlem te chhunga tih zawh ngai a ni a, chumi ti thei tur chuan department a thawk zawng zawng te chu team khat an nih inhre reng chungin ṭangrual turin a chah a ni.

Minister tawiawmtu  Pu Vanlalmawia, MCS, Secretary, LR&S pawn thawktute inpekna chu ropui a tih thu sawiin, department kalphung leh hna kalpui danah mipuite tana samkhai tur zawng zel chunga inher rem chhoh zel a pawimawh thu a sawi a. LR&S department chu UT hunlai aṭang tawha awm tawh department hnuhma (legacy) nei thui tak leh kalphung nghet tak nei a ni a, chutih rualin thil ṭha zawk leh tihdan thar bakah thiamna thar hmanga inthuam chak zel a ṭul thu a sawi ve bawk.

LR&S Officer leh staff ten an record thliar leh siamfel mekte chu an kalpui dan leh an hnathawh dan te Minister hi an lo hrilhfiah a. Minister leh Secretary ten zan tlai pawh sawi lova an hnathawh a tak ngeia an rawn enpui chu office a thawkte chuan phurna nasa tak a pek thu sawiin Minister-in zanriah a buatsaih sak avanga lawmthu an sawi bawk a ni.

Attachment

  • Loading attachment...