2017/2024-2025

Aizawl the 12th September, 2024 : Mizoram Youth Commission, Lynchpin India leh Zalen Events te tangkawpin Class 12 zirlaite tana an buatsaih Career guidance and Counselling - School Connect 2024 chu vawiin khan Chanmari YMA Hall-ah Pu Malsawmzuala Ralte, Chairman, Mizoram Youth Commission chuan a hawng a. Mi hlawhtling ni turin T5 - taimak, tumruh, tei rei peih, thawhrimna leh time table neih te a pawimawh tih a sawi. 'School Connect' hi naktukah chhunzawm leh a ni ang.

MYC Chairman Malsawmzuala Ralte chuan zirlai kalkhawmte chu social media tuipui hlauhawm thu a hrilh a. Hetiang hian awmzia a neih loh thu leh hlawkna a awm loh thu a sawi. MYC chuan coaching class tha tak a kalpui mek a, district hrang hrangah te pawh kalpui mek a ni a ti. MYC Chairman chuan hmabak eng tak tak nei zirlai te vanneih tawh zia thu sawiin, an puitlin huna an career tur thlanna hun remchang tak chhawpchhuah a ni chu lawmawm a ti a. Tun atanga kum reilo te ah chuan nupui pasal neia chhungkaw din tur an nih avangin chhungkaw enkawlna tur eizawnna mumal tak an neih a ngaih thu sawiin, lehkha zir mawl tawp lova, mahni hmalam hun tur lo duang lawk sa a chumi mil a lehkha zir a pawimawh thu zirlai kalkhawm te hnenah a sawi a ni.

MYC Chairman chuan zirlai te tan School Connect programme chu an hmalam huna an kawng zawh tur, nuna hlawhtlinna an neih theihna tura kawhhmuhtu a nih ngei a beisei thu a hrilh bawk. School Connect hawnna hun hi ZALEN Editor Vanlalrema Vantawl chuan a kaihruai a, School Connect 2024 buatsaih a nih chhan a sawi.

School Connect 2024 hi ni 2 awh tura ruahman a ni a. A hawnna hunah hian Aizawl khawpui chhunga Higher Secondary School class 8 atangin Class 12 zirlai 2200 chuang an kalkhawm tura beisei a ni. Hemi bakah hian Women Polytechnic Aizawl leh Govt. ITI, Aizawl bakah phai lam atangin Institution 15 an tel bawk a. School Connect 2024 in a tum ber chu Class 12 zirlai ten tuna an zirlai an zir zawh huna an kal leh zelna tur kawng lo kawhhmuh leh kawng awm thei ang te lo hriattir a ni a. Hemi atan hian India ram hmun hrang hrang atangin thiamna bik nei mi engemaw zat topic hrang hrang sawi tura sawm an ni.

He hunah hian tualchhung leh state dang mithiamte hnen atangin ni khatah session 8 zel an ngaithla dawn a, ni 2 chhungin session 16 awm tura ruahman niin chung zingah chuan - Career in Air force and other Defence services, New age Career Opportunities, Career option after class 12, Work opportunities through the internet, Study & India ram pawn a hna thawh theih dan kawng kawhhmuh te a tel a ni.