1369/2026-2027

Dated Aizawl the 11th July, 2026 : Vawiin khan Health Minister Pi Lalrinpuii chuan Kolkata khawpuiah Manipal Hospital, Broadway, Salt Lake leh Kalikata Road a awm Kolkata Kidney Institute te a tlawh.

Manipal Hospital, Broadway, Salt Lake a awm hi Superspeciality Hospital a ni a, Mizoram Sawrkar empanelled hospital a ni. Mizoram house, Salt Lake bul lawka awm niin, Mizoram atanga damlo kal ten an pan nasa in a tangkai hle a ni.  Minister hian an facilities neih hrang hrangte a hmun ngeia a enpui bakah Mizoram atanga damlo awmte a kan nghal bawk.

Manipal Hospital hian india ram pumpuiah Hospital 49 an nei mek a, chung zinga hospital 5 chu MUHCS hnuaia empanelled mek niin, India ramah chuan hospital nei tam leh tha ber te zinga mi a ni.

Health Minister hi Mrs Kakali Mukherjee Unit Director leh a team te bakah Dr Smartha Pulai leh a team ten an lo dawngsawng a.  Mizoram atanga damlo tam zawk an enkawl theih nana hmalakna thar hrang hrang an neih te an lo hrilhfiah a, damlo khumin a daih loh avanga day care centre an hawn belh atanga khum 35 chu mizoram damlo tan bika an ruahman thu te an lo hrilh a ni.  Experience nei Mizo nurse tam zawk chu thawk tura lakbelh an duh reng thu te an sawi a, hemi chungchangah hian Minister chuan August thla chhunga recruitment buaipui tura lo zin turin a sawm bakah, Mizoram atanga damlote duat tak leh uluk taka an lo enkawl avangin lawmthu a hrilh nghal bawk a ni.

Hemi hnu hian Kidney Transplant doctor experience rei tak nei tawh rualin an din - Kolkata Kidney Institute chu a tlawh leh nghal a.  Minister hi Dr.Pratik Das,Director, Dr.Keshab Sil,Senior Consultant, Dr Amar Pratap Singh,Consultant Nephrologist leh 

Mrs.Chaitali Das Pradhan,Nursing Superintendent ten an lo dawngsawng a, Kidney transplant lama experiance nei tha tak tak doctor leh thawktuten man tlawm zawka kidney transplant an kalpui dan te a hmunah an lo enpui a.  He hospital hi Mizoram atanga damlo, kidney transplant mamawhte tana tangkai taka hman a nih theihna turin inbiak chhunzawm zel nise an ti a ni.

 Damdawi in a tlawh bakah hian Pi Lalrinpuii chuan nimin ni 10.7.2026 khan West Bengal Health Minister thar - Dr Sharadwat Mukherjee nen inkawmna hun tha tak an nei bawk a.  Dr Sharadwat nen hian hriselna kawnga India hmar chhak lam state hrang hrang ten tangruala hmalak ho theih dan tur leh Minister te inhmuhkhawm theih dan tur kawng zawn ni se tha an tih thu an sawi dun a, West Bengal sawrkar in health insurance kalpui a tum thar dan tlangpui te lo hrilhin, mipui te tan MUHCS tha a tih thu te pawh a lo sawi a ni.  

Pi Lalrinpuii chuan West Bengal a state sawrkar thar lo piangah beiseina sang tak an neih thu hrilhin, an state chhunga minorities te thlamuang taka an awm theih nana hmala turin a ngen a, a bik takin tun hnai a West Bengal, Subhasgram a Kristian te Biak In suasam a nih chungchangah pawh theihtawp chhuaha hmalak pui turin a ngen nghal bawk.  India ram hi sakhaw zalenna ram a nih angin khawi state ah pawh sakhaw hrang hrang betute thlamuang taka an awm theihna turin hemi kawngah hian state tina Sawrkar hotuten hma an lak tul a tih thu a hrilh nghal bawk. 

Health Minister hi Pu Zoremthara Ralte, Joint Resident Commissioner; Pu Lalngura Sailo, Assistant Resident Commissioner; Pu Rokhawma Colney, Staff Nurse leh Pu H. Lalhruaitluanga, PS to Minister ten an tawiawm a ni.