2373/2026-2027

25th September, 2026 :  Vawiin chawhma dar 11 khan Health Minister Pi Lalrinpuii chuan kum 2026 atana Mizo Students' Union, Shillong Freshers Social, NEIGRIHMS Auditorium, Shillong a neih chu Khuallian niin a hman pui a. Prof Dr Nalin Mehta, Director, NEIGRIHMS chu khual zahawm a ni.

Shillong-a Mizo zirlai zawng zawng intelkhawm Mizo Students Union Freshers Social, 2026-ah hian thusawiin Pi Lalrinpuii chuan hnam hmangaihna ril tak nei zirlai pawl chak tak - Mizo Students Union, Shillong kan nei chu lawmawm a tih thu a sawi a. Zirlai kalkhawmte chu tunlai hmasawnna mil zela inherrem thiam a, work smart tih kan sawi uar ang chiaha zirna kawngah pawh smart taka rilru zawng zawng nena hmasawn zel tum turin a fuih a. 

“Lehkha thiam kan neih tam tawh viau laiin All India Service lama lut erawh kan awm hlei thei lo hi ngaihtuah ngun a ngai hle a. Zirlai mai ni lo Sorkar hna hmu tawhte zingah pawh, Central Scheme hrang hrangte kan State mila chawk luh dan thiam kan la tam tawk lo deuh em aw a tih theih a ni,” Minister chuan a ti.

Pi Lalrinpuii chuan Mizo mi thiam hmasate kha Shillong aṭanga zirchhuak an ni tlangpui ṭhin a, kohhran leh khawtlanga an lo inhman thinna te chuan anmahni ah leadership quality tha tak neih tirin, chhungkua, kohhran, khawtlang leh Sawrkar lama hruaitu leh hotu chhuanawm tak tak an ni tawh ṭhin, a ti a.  Rual u ten rahbi an lo chher tawh chhunzawm zel tura theihtawp chhuah turin zirlai kalkhawm te fuihin, Health Minister chuan Ruihhlo leh HIV/AIDS laka fihlim zel turin a ngen a ni.

He hunah hian Khualzahawm Prof Dr Nalin Mehta pawhin thu sawiin he huna lo kal zirlai fel tak takte aṭang hian Mizoram chuan hmalam hun eng tak a nei a, tun hma lama zirlai te ngaihtuah chuan tunlai zirlaite chuan theihna sang tak an nei tawh nia a hriat thu sawiin, theihtawp chhuah zel turin a fuih bawk. 

He hunah hian nikum 2025-26 chhunga zirlai tiṭha te chawimawina hun hman a nih bakah MSU Annual Magazine, 'Awpbehna ata Zalenna' tih thupuia nei - 'Hnam Lungphum chu Khuallian hian a tlangzarh nghal a ni.

Mizo Students Union, Shillong hi Kum 1979 khan Shillong-a Mizo zirlai zawng zawngte tan a din a ni a. Kum tinin zirlaite tan kawng hrang hrangin hma an la ṭhin a ni.