2374/2026-2027 

Aizawl, 25th September 2026: Mizoram pawna hnathawka kal chhuakte himna tur ruahmanna, ‘Migrant Initiative for North-East (MINE)’ project sawihona, ‘Round Table Interactive Session’ chu vawiin khan Directorate of Labour, Employment, Skill Development & Entrepreneurship (LESDE), MINECO, Aizawl Auditorium-ah neih a ni a; Pu Lalnghinglova Hmar, Hon’ble Minister, LESDE Department chuan session hi a kaihruai.

Ferrando Development Educational and Welfare Society (FDEWS) leh LESDE department ṭang kawp buatsaihah hian state pawn lama Mizo hnathawkte him taka an thawh theihna tur leh, sorkar department-te leh stakeholder hrang hrangte’n thawhho tha zawk theih dan tur sawiho a ni.

LESDE Minister Pu Lalnghinglova Hmar chuan ram pawna Mizo hnathawkte him leh mumal zawka an thawh a, hamthatna an dawn tur ang an dawn zel theih nan sawrkar leh mawhphurtu dangte tha taka thawhho chhunzawm a pawimawh tih a sawi a, "Mizo ṭhalaite state pawna hnathawk tura kan infuih rual hian an hnathawh tur thlan danah te, hnathawhna hmun thlan danah fimkhur a ṭul takzet a ni," a ti. 

Tun hnaia India ram state pakhata Mizo hnathawkte hnathawh dan leh an hnathawhna hmun zirchiannaah hna him tawk lo nia lang thei a awm thu leh, fimkhur taka vil zui zel a nih thu LESDE Minister chuan a sawi lang bawk. 

Vawiina inrawnhona-ah hian Dr. Lalhriatzuali Ralte, Secretary, LESDE Department in kalkawmte lawmna thu a sawi a. FDEWS Project Consultant in MINE Project leh a thil tumte sawifiahna in, Sister Rose Paite, FDEWS in migrant worker-te him taka an thawh theih nana Sawrkar leh private organisation te thawhho theih dan tur presentation a pe bawk a ni. 

Pu Lalmuanpuia Fanai, Deputy Director, LESDE pawhin labour kaihhnawih dan leh hrai chungchangte a sawi bawk.

Programme-ah hian FDEWS, FIWDC, AMC, CWC, sorkar department hrang hrang, MzSRLM, CID (Crime), MSD&RB, MSCPCR, Mizo Diaspora Cell leh journalist aiawhte bakah Directorate of LESDE officers leh staff-te leh stakeholder dangte an tel a ni.