2372/2026-2027

Lunglei, 2026 Mimkut Thla ni 25: Vawiin khan Lunglei District Water & Sanitation Mission (DWSM) chu Additional Deputy Commissioner Pi Zoramdini hovin a hna thawh pindanah an ṭhu khawm a. Public Health Engineering, Rural Development, Local Administration leh Information & Public Relations official-te an tel.

PHED Lunglei Sub-Divisional Officer (North) Er NT Jevis leh PHED Lungleia Swachh Bharat Mission–Gramin (SBM–G) District Coordinator Pi F. Lalrindiki te'n PHE Department hma lakna hrang hrang leh Lunglei District dinhmun an tar lang a. Lunglei District chhung thingtlang khaw hrang hranga tui lak hnar humhalh dan tur leh tuihna tihpun dan tur te, Village Water & Sanitation Committee (VWSC)-te'n ṭha leh felfai zawka an khaw tui lak an enkawl theih dan tur rawtna te, faina leh thianghlimna kawnga hma lak dan tur leh hmachhawp hrang hrangte an sawi ho a ni.

PHED-in Lunglei District chhunga thingtlang khaw hrang hrang tui lak hnara tuihna awm dan an zir chiannaah khua/chenna 110 zinga 59 chu an tuihna a kiam nasa tawh hle tih hmuh chhuah niin, khaw 51 chu ngaihtuahawm lutuk lova dah a ni a. Tuihna kiam nasa zual khuaahte a nasat dan azirin tuihna tipung tura khur laih leh thawm ṭhat te, khaw tinah thing phun belh leh tuihna humhalh leh tipung tura ruahmanna hrang hrangte kalpui turin kawng dap ni se, tih a ni.

Thingtlang khaw hrang hranga tui pekna (rural drinking water system) chu siam zawh a nih hnuah a enkawl zui chu VWSC kuta awm a nih thu leh tui man aṭanga mahni inenkawl zo tura beisei an nih thu sawi lan niin, VWSC hrang hrangte mumal leh rualkhai zawka an kal theih dan tur te, ṭha taka tui lak an enkawl zui theih nana rawtna hrang hrang te sawi ho a ni a. Thingtlang khuaa tui hnianghnar a awm theihna tur leh faina leh thianghlimna chungchanga hma lak dan tur hrang hrangte sawi ho a ni bawk.

Swachh Bharat Mission (Gramin) hnuaiah Lunglei District-ah Mi Mal Inthiarna In (Individual Household Latrine) 26,680 sak zawh tawh niin, sak mek 299 a la awm a. Khaw hrang hrang 25-ah Vantlang Inthiarna In (Community Sanitary Complex – CSC) 33 sak zawh tawh niin, Bawlhhlawh Paihna (Solid Waste Management) project 606 leh Tuichhe Paihna leh Sawngbawlna (Liquid Waste/Greywater Management) project 55 thawh zawh a ni a. Kum 2026–2027 chhungin khaw 38-a sikul 64 leh damdawi in (wellness centre) 5-ah Greywater Management siam mek awmin, khaw 40-a sikul 71 leh damdawi in 5 tan NT Jevis Twin Pits leh khaw 97-a sikul 154 tan Hmeichhe Inthiarna (Separate Girls' Toilet) sakna tur ruahman leh dil mek a ni.