2371/2026-2027

Dated Serchhip, the 25^th September: Vawiin khan Serchhip DC Meeting Hall-ah Addl. DC Pi Dorothy Muansangi kaihhruaiin June 2026 Quarter tawpa Serchhip District chhunga Bank hrang hrangte dinhmun thlirletna leh sawi hona neih a ni. Lead District Manager Pu Lalnghawrliana leh Serchhipa Bank hrang hranga Branch Manager-te bakah sawrkar department hotute an tel a ni.

Vawiin thutkhawmah hian Govt. Sponsored Scheme hrang hrang NRLM, NULM, PMEGP, SUI, PMMY, KCC leh Social Welfare Scheme – PMJJBY, PMSBY leh APY etc. hnuaia hmalaknate leh Bank hrang hrangte thawh that dan (performance) report- te en ho niin, tan lak ngaihna laite sawi ho a ni a. Govt. Schemes kalpui thin sawrkar department hrang hrangte leh bank-te inkara thawh hona tha zawk a awm theih dan turte leh Financial Literacy Camp - sum leh pai enkawl dan leh bank kaltlanga sum khawl leh peipun dan inzirtirna chungchangte sawi ho a ni bawk a. Bank branch hrang hrangte him lehzualna tur chungchang te, loan rulh that loh awm thin (NPA) tih tlem dan tur te, Community Based Recovery Mechanism (CBRM) kalpui dan te, mobile/computer kaltlanga dan bawhchhiatna (Cyber Crime/Fraud) awm thei laka inven dan chungchangte sawi ho a ni bawk.

June 2026 quarter tawp, ni 30.06.2026 thlenga Serchhip District-a Bank-a pawisa dahluh tawh zawng zawng tlingkhawm chu cheng nuai 65000.41 a ni a, Bank-in loan a pekchhuah tawh chu cheng nuai 45319.31 niin, Credit Deposit Ratio (CD Ratio) chu 69.72% a ni a (CD Ratio hi Bank-in mipui pawisa a khawl atanga loan a pekchhuah zat tehna a ni), hei hian District chhungah sum che vel a ṭha tih entir a ni. Pradhan Mantri MUDRA Yojana (PMMY) hnuaiah June 2026 quarter tawp chhungin mi 96 hnenah Rs. 286.25 lakh semchhuah a ni. National Rural Livelihood Mission (NRLM) hnuaiah Self Help Group (SHG) 19 hnenah Rs. 98.23 lakh pek a ni a, Pradhan Mantri Jan Dhan Yojana (PMJDY) hnuaiah District chhungah bank account 23,000 hawn tawh a ni bawk