2370/2026-2027

Dated Aizawl, the 25th September, 2026: Vawiin khan Environment, Forests & Climate Change Minister leh SWA Chairman ni bawk Pu Lalthansanga kaihhruaiin State Wetland Authority (SWA) thutkhawm vawi 6-na Chief Wildlife Warden Conference Hall, MINECO, Aizawlah neih a ni.

Minister Pu Lalthansanga chuan Mizoramin tun dinhmunah wetland pahnih- Pala leh Tamdil te kan neih thu sawiin hengte hi kan ram leilung hausakna, nungcha chi hrang hrang chenna leh tuihna humhalhna hmun pawimawh tak an nih thu a sawi a. Climate change-in kan chenna leilung a nghawng nasa lutuk tur ven nan te, kan ecosystem chhe zel tur ven nan mi tinte tanrual a pawimawh thu a sawi bawk.

Thutkhawmah hian SWA thutkhawm vawi 5-na thurel bawhzui dante thlirlet niin, wetland kaihhnawiha court case awm mek chungchang te, Mizorama wetland dinhmunte leh SWA din thar leh chungchangte sawi ho a ni a. Committee chuan Mizoramin Wetland kan neih tawh sa pahnih - Pala leh Tamdil bakah, Technical Committee-in a recommend thar pahnih - Bualsen Dil leh Pang Dil, Thenzawl Forest Division huam chhunga mite chu Wetland-a puan an nih theih dan tur chungchangte ngaihtuah a ni a; heng bakah hian Space Application Centre (SAC) report-in a tarlan anga Mizorama wetland awm theihna tura rin, hmun 128 zinga 78 te chu, mihring siam chawp an nih avangin Wetland-atana an tlin loh thu te; hmun pathum - Tamdil, Pala leh Chakma Autonomous District Council huam chhunga water-logged area te chu demarcation atana an qualify thute tarlan niin, a hmunah ngei kalchilha, enfiah thuai tura rel a ni bawk.

Vawiin meeting-ah hian Principal Secretary, Pu Sudhir Kumar te, Principal Chief Conservator of Forest Pu Rajeev Kumar Tiwari te, I&WR Departmet Secretary Pu Rothanga te bakah Ex-Officio member leh Expert member eng emaw zat an tel a; Shillong-a MoEFCC Regional Office atangin Video Conference hmangin meeting hi an rawn chhim bawk. Aizawl DFO Pu Lalbiakchama’n lawmthu sawiin hun a khar a ni.

Mizoram Sawrkar chuan Wetlands (Conservation and Management) Rules 2017 tlawhchhanin kum 2018 khan Mizoram State Wetland Authority (SWA) hi a din a; EF&CC Minister chu Chairman niin, Chief Secretary chu Vice Chairman a ni a, Chief Wildlife Warden chu Member Secretary a ni.