1599/2026-2027

Saitual, the 31st, July, 2026: Vawiin khan NE Khawdungsei Primary Health Centre (PHC) building sak thar hawnna hun hman a ni a, Health & Family Welfare Minister Pi Lalrinpuii chu khuallian niin a hawng nghal a, Power & Electricity Minister Pu F. Rodingliana leh Saitual District Bawrhsap Pu Srinivas Sadi ten an tawiawm bawk a ni.

He hunah hian Health & Family Welfare Minister Pi Lalrinpuii chuan thu a sawi a, Mizoramah Doctor indaih lo hle mahse Sawrkar hmalaknaa Medical Officer awm thlapa NE Khawdungsei PHC changtlung tak hawn a ni thei chu lawmawm a tih thu a sawi. Doctor indaihlohna phuhru turin Sawrkarin hma a la chho mek zel tih sawiin, ZMC-a zirlaite chu Sawrkara an thawh theih nan bond year an sign thin thu a sawi bawk a ni.

Health Minister chuan NE Khawdungsei PHC sak zawh a nih theih nana tha leh zung sengtu zawng zawngte chungah lawmthu a sawi a, mipuite pawh a enkawl zuina kawngah a thawktute tha taka thawhpui turin a chah a ni. Khuallian chuan NE Khawdungsei mipuite MUHCS hmang thei loa an lo awm chu pawi a tih thu sawiin, Block Account Manager (BAM) atan an khuaa B.Com zir chhuak thlang chhuak turin mipuite chu a chah a, MUHCS pawh an hman theih tawh tur thu a sawi. Pi Lalrinpuii chuan khawtlang mipuite chu uluk leh dimdawi taka enkawlpui tur leh a thawkte pawh zawldawh taka thawhpui turin a chah a, mipuiten a tangkai thei ang bera an hman theih nan theih tawp chhuah turin kalkhawmte chu a fuih a ni.

P&E Minister, bialtu MLA ni bawk, Pu F. Rodingliana pawhin thu sawiin, NE Khawdungsei PHC chu tangkai lehzual zawka hman a ni thei tur chu lawmawm a tih thu a sawi a, a hlawhtlinna kawngah pawh mipuite thawhhona a tha hle a ni, a ti. P&E Minister chuan Health Minister hmalaknaah lawmthu a sawi a, mipuite pawhin tangkai taka an hman theih nan a duhsakna a hlan bawk a ni.

NE Khawdungsei PHC hi November ni 19, 2024 atanga sak tan a ni a, May ni 18, 2026-ah sak zawh a ni. He PHC chhungah hian casualty, male & female ward, main centre, kitchen, consultation room, delivery room, preparation room, ophthalmic assistant room, minor OT, laboratory, Ayush room, allopathy room, nurses changing room, X-ray & dark room leh toilet block te a awm a ni.

NE Khawdungsei PHC hawnna inkhawmah hian Dr. Lily Chhakchhuak, Director, Health Services chuan inlawmna thu a sawi a, Upa SH. Vanlalhnema chuan hunserh a hmang a ni. Health & Family Welfare Minister Pi Lalrinpuii bakah hian P&E Minister Pu F. Rodingliana, Saitual DC Pu Srinivas Sadi leh NE Khawdungsei VC President Pu Lalhmingmawia ten thu an sawi a, Er. Lalramsanga, Sr. EE Health & Family Welfare Dept. chuan technical report a pe bawk a ni. Dr. Zothanpari Chhakchhuak, Dy. CMO, Saitual District chuan lawmthu sawiin hun a khar a ni.

PHC hawnna inkhawm zawhah hian Health & Family Welfare Minister Pi Lalrinpuii chuan NE Khawdungsei Aganwadi Centre, Khawkawn Sub-centre, Pawlrang Sub-centre leh Saichal Sub-Centre-te a tlawh a ni.