1598/2026-2027

Dated Aizawl 31st July, 2026: Vawiin khan Mizoram Agricultural Marketing Board (MAMB) Committee Room-ah Agriculture & Farmers' Welfare Minister, Pu PC Vanlalruata hovin Agriculture & Farmers’ Welfare Department leh Spices Board, Ministry of Commerce & Industry, Govt. of India-te chuan inkawm hona hun an hmang.

Minister chuan inhrilhhriatna leh inzirtirna (sensitization) nei tura lo kal te hnenah lawmthu sawiin, Agriculture-a hmasawn zel theihna turin sawrkarin Farmer Producer Company (FPC) chu thawhpui a tum thu a sawi a. Sawhthing tihrona khawl (Ginger drying machine) pawh sawrkarin a ngaihven mek thu sawiin, FPC-te chu sawrkar nena an thawh hona turah theihtawp chhuah tur leh inpuahchah turin a hrilh bawk. Thlai chi hnih leh a aia tam chin rual (inter cropping) chu a ngaihpawimawh thu leh uar zawka hman a tul thu a sawi bawk a ni.

Pi Ramdinliani, Secretary, A&FW pawhin thu sawiin, Mizoram sawrkar chuan agriculture hmasawnna turin thlai tharchhuah zat tihpun dan tur (production focused) ngawt ngaihtuah lovin, loneituten mipuite mawmawh thlai an tharchhuah theihna tur leh man tha zawka an thlai tharchhuahte hralh a nih theihna (market driven agriculture) turin ke a pen mek zel thu a sawi a. FPC-te chu India market-ah chauh ni lo, global market-ah pawh hlawhtling thei tura theihtawp chhuah turin a fuih bawk.

Pi Vanramthangi, Director A&FW pawhin thu sawiin, meeting nei tura kalkhawmte chungah lawmthu a sawi a, Mizoram-a loneitute hnena Spices Board hnuaia scheme awm te inzirtirna turin meeting chu buatsaih a nih thu a tarlang bawk.

Spices Board Deputy Director, Pu BD Sharma chuan Minister leh A&FW Department chungah lawmthu sawiin, Spices Board hnuaia scheme hrang hrang chungchang PPT hmangin a tarlang bawk a ni.

Programme hi Pu Lalhmingmuana, Managing Director, MAMB chuan  kaihruaiin, Agriculture & Farmers' Welfare Department leh Mission Organic Mizoram officials-te bakah Mizoram hmun hrang hranga Farmer Producer Company (FPC) leh Farmer Producer Organisation (FPO) aiawh te meeting-ah hian telin, Spices Board aiawhin  headquarters, Kochi, Kerala atangin Deputy Director Pu BD Sharma a tel bawk a ni.