1828/2026-2027

Lunglei, 2026 Thlazing ni 17: Vawiin khan Mizoram sawrkara Health & Family Welfare Minister Pi Lalrinpuii chuan TATA AIG General Insurance Company Ltd aṭanga Corporate Social Responsibility (CSR) Healthcare Theme hnuaia Lunglei District tana dawn, damdawi in kal thei, Mobile Medical Unit (MMU) lirthei thar chu Civil Hospital Lunglei Auditorium-ah tlangzarhin, Lunglei District chhung hmun hrang hranga hriselna kaihhnawih hma laknaa ṭangkai taka hman atan a vai liam.

MMU thar tlangzarh puala inkhawm buatsaihah Khuallian Pi Lalrinpuii chuan Lunglei District tana MMU thar tlangzarh theih a ni ta chu lawmawm a tih thu leh Lunglei District mipuite leh thingtlang kilkhawr zawka mite tan thil lawmawm tak a nih thu a sawi a. Sum leh pai tam tak senga Lunglei District mipuite hriselna atana MMU ruahmansaktu TATA AIG leh an thawhpui Swasti–The Health Catalyst te chungah leh a taka kalpuitu tur MFM te chungah lawm thu sawiin, H&FW hotute leh Lunglei District-a official-te, hriselna kawnga thawktu leh khawtlang hruaitute, he thil hlawhtlin nana tha thawhtu zawng zawng chungah lawm thu a sawi.

Health Minister Pi Lalrinpuii chuan Lunglei District-a chhungkaw tam takin damdawi in pan turin harsatna an la neih thu sawiin, inentir tur leh inenkawl turin hmunpui pan nan sum leh tha tam tak an sen a ngai tih a sawi a. Mipuite'n hriselna kawnga enkawlna ṭha zawk an hmuh theih nan MMU chuan mipuite tan service a chhawp hnaihsak dawn tih sawiin, MMU-in a ken tel X-ray khawl, thisen dah ṭhatna leh natna endikna khawl hrang hrangte chu a ṭangkai dawn hle tih a sawi a. Hriselna kawnga hma laknaah mi tin huap zo tura ruahmanna siam ṭhin a nih thu sawiin, MMU thar tlangzarh tak chu sawrkar, sumdawng, pawl leh mipuite thawh hona leh ṭan rualna hmanga mipuite hamṭhatna kawnga hma lak sawtzia leh pawimawhzia tar lanna leh hmasawn zel tura rahbi pawimawh tak a nih thu a sawi a. MMU team-te chuan mipuite tan ṭhahnem ngai taka hna an thawh a beisei thu sawiin, mipuite pawhin MMU chu a ṭangkai thei ang bera hman tum turin a chah.

Health Minister chuan Lunglei tana hriselna lama hmasawnna tur ruahmanna leh hmachhawp awmte sawiin, Chief Medical Officer (CMO) Office sak zawh loh chu sak zawh tuma hma lak mek a nih thu leh pawisa pawh hmuh theih mai beisei a nih thu a sawi a. Civil Hospital Lungleia thawktu quarters sak ṭhatna tur pawh ruahmanna siam a nih thu leh ṭhenkhat chu theh luh a nih tawh thu sawiin, Critical Care Block (natna khirh bik veite awmna tur) pawh sum tam tak senga sak turin approval hmuh a nih tawh thu leh Ministry aṭanga sum tumsak tur a nih thu a sawi a. PM CARES aṭanga Civil Hospital Lungleia MRI khawl bun tur pawh a lo kal mek thu leh rei lo teah bun fel thuai beisei a nih thu sawiin, chhim lam mipuite tan hriselna kawnga hmasawnna lawmawm tak a nih tur thu a sawi.

MMU Vehicle pakhat bakah hian Tlabung Block lam lawnga kal ngaiah MMU Boat pek belh tura Minister-in a dilna chu TATA AIG leh Swasti lam hotute chuan remtihsakin, Minister hian MMU Vehicle leh Boat chu ṭangkai taka hman atan a vai liam nghal a. MMU tana thawktu panga – supporting staff pali leh driver ruahman sa bakah, Laboratory Technician pakhat dah belh tura a dilna pawh an pawmsak nghal bawk.

Director of Health Services Dr Lily Chhakchhuak chuan hun kaihruaiin, inlawmna thu a sawi a. Lunglei District tana MMU thar hmuh a nihna kawnga hma latu zawng zawngte chungah lawm thu sawiin, Mobile Medical Unit chu hmun kilkhawr leh damdawi in awm lohnaa hriselna kawng hrang hranga hma lak nan leh rang taka thlen zung zung theih nan ṭangkai taka hman a nih tur thu a sawi a. MMU chu natna inkai chhawn theih leh inkai chhawn theih loh chungchanga hma lakna hrang hrangah te, a thlawna damdawi sem leh a thlawna inentirna buatsaih nan te, hriselna kaihhnawih inzirtir nan te ṭangkai taka hman ṭhin a nih thu sawiin, ṭangkai zawka hman a nih theih nan a hmanna tur hmun leh hunbi te fel taka ruahman hmasak a ṭul thu a sawi a. Kum 2025-a Mamit District tana TATA AIG CSR kal tlanga MMU tlangzarh chu ṭangkai taka hman a nih thu leh hriselna lamah hmasawnna nasa tak a thlen thu sawiin, Lunglei District pawhin hma a sawnpui a beisei thu a sawi.

He hunah hian Pu Devang Pandya, Vice President & Lead – CSR & Sustainability, Tata AIG, Mumbai chuan Tata AIG hnuaia North-East tana Corporate Social Responsibility (CSR) hma lakna chungchang sawiin, Pu Madhukar Sinha, President – Government & Rural Business, Tata AIG, Mumbai chuan North-East-a Tata AIG hma lakna hrang hrang a sawi a. Pu Joseph Julian KG, Senior Director, Swasti chuan vantlang hriselna lama Swasti hma lakna sawiin, Pu P. Bhoopathy, Director, Social Protection, Swasti chuan Mizorama MMU leh Social Protection hma lakna an kalpui dan a sawi fiah a. Pu Lalramchuanzela, Executive Director, Mission Foundation Movement chuan Mamit District eh Lunglei District-a TATA AIG leh Swasti nen ṭang hova MMU Project kalpui dan leh hmachhawp tlangpui a sawi fiah bawk a. Lunglei District Senior Chief Medical Officer Dr Lalrinthangi'n lawm thu sawiin hun a khar.

He hunah hian Director of Hospital & Medical Education Dr LP Zonunmawii, Lunglei Municipal Council Chairman Pu Lalzuithanga, Vice Chairman Pu K. Lalrinawma leh Councillor-te, H&FW leh department hrang hrang official-te, TATA AIG, Swasti leh MFM ai awhte, tlawmngai pawl hrang hrang leh political party hruaitute leh thu thar theh darhtute an tel a. TB damlote tana chaw ṭha pekna tur Nikshay Mitra Scheme hnuaia damlo 20 chhawmdawlna tur sum a pek avangin Health Minister Pi Lalrinpuii hi District TB Office chuan memento an hlan bawk.

MMU hi TATA AIG General Insurance Company Ltd-in CSR fund aṭangin a leina leh a cheibawlna sum tumin, Swasti-The Health Catalyst te nena thawk hova buatsaih a ni a. Mission Foundation Movement (MFM) chu a taka kalpuitu leh enkawltu (Implementing Agency) an ni.

Lunglei District tana ruahman MMU hi Tata Yodha Pick Up niin, a lirtheia hi cheng nuai 12 man a ni a. Damlo enna khawl famkim nena thuam niin, X–Ray leh test-na chi hrang hrang bungrua cheng nuai 26 chuang hmanga thuam a ni a. A enkawltu tur thawktute rawihna pawh a keng tel nghal vek bawk.

Mobile Medical Unit hi Lunglei District-a doctor leh damdawi in awm remchan lohna khaw hrang hrang tlawh kual tur niin, Doctor, Nurse leh Medical staff-te nen he'ng khaw hrang hrang hi fang kualin, damlo en mai bakah, sawrkar laipui hnuaia social protection leh health insurance scheme hrang hrang inzirtirna te buatsaih ṭhin a ni bawk ang.