1827/2026-2027

Lunglei, 2026 Thlazing ni 17: Mizoram sawrkara Health & Family Welfare Minister Pi Lalrinpuii chuan vawiin khan Urban Infrastructure Development Fund (UIDF) sum cheng nuai 200 senga Lunglei Park (Chanmari, Lunglei) chei ṭhat hna thawh tur lungphum a phum.

Lunglei Park Renovation lungphum phum puala UD&PA Office-a inkhawm tawi buatsaihah Khuallian Pi Lalrinpuii chuan Lunglei chei ṭhat leh chei mawi chu a tir aṭanga a rilrua lian leh a vei a nih thu sawiin, "Unique Lunglei" tih hming chawiin mawi danglam bik taka Lunglei chei turin Lunglei Beautification Committee an din thu te, Lungleia MLA-te leh Lunglei Municipal Council (LMC) Councillor-te'n Lunglei cheina tur sum thawh khawma ruahmanna siam a nih thu leh hma lak chhoh zel a nih tur thu te a sawi a. Lunglei khawpui laili taka awm Lunglei Park chu Lunglei chei mawitu atan leh vantlang len khawthawnna hmun nuam taka siam turin LMC leh UD&PA Department te nen chei ṭhat dan tur kawng dap a nih thu sawiin, Mizoram sawrkarin UIDF aṭanga chei ṭhatna tur a ruahmansak chu lawmawm a tih thu a sawi a. Hna thawktute'n ṭha taka thawk tura chahin, Lunglei khawpui timawitu a nih ngei theih nan sawrkar department-te, LMC, khawtlang hruaitu, tlawmngai pawl leh mipuite'n mahni theihna zawnah theih tawp chhuah ṭheuh turin sawm.

Minister Pi Lalrinpuii chuan Lunglei khawpui hmun hlui pawimawh, Tarmita Khawthlirah Skywalk siam tum a nih thu sawiin, Ministry of Tourism hnuaia PRASHAD (Pilgrimage Rejuvenation and Spiritual Heritage Augmentation Drive) Scheme aṭangin cheng vaibelchhe 3 chuang project buaipui mek a nih thu leh hlawhtling ngei tura beisei a nih thu a sawi a. Lunglei mawi taka siam turin LMC lam thawhpuina leh enkawlna hnuaiah hma lakna hrang hrang kalpui chhoh tum a nih thu te, sum leh pai leh ruahmanna chungchangah UD&PA lam nen inrawn tlanga hma lak a nih thu te sawiin, UIDF hnuaiah pawh hma lakna dang tam tak a la awm thu a sawi a. UIDF hnuaia hna thawh chu a enkawlna tur mahni inchawm thei (sustainable) a nih a ṭul avangin Lunglei khawpuiah man chawia hman theih inthiarna, Pay & Use Toilet te pawh sak tum a nih thu a sawi.

Pi Lalrinpuii chuan Chanmari chu Lunglei khawpui lailia awm leh khawpui hmel lanna pakhat a nih angin mawi taka chei turin Chanmari Beautification Committee kal tlanga hma lak a nih thu sawiin, Chanmari Thlanmual mawi tak leh kawng ṭha tak siam turin ruahmanna siam mek a nih thu te, Chanmari veng chhung bikah kawtkai, in chhungkhur, office, zirna in leh kawtthler vawn fai leh chei mawi kawngah inelna buatsaih tum a nih thu te a sawi a. Veng hrang hrang leh MLA bial hrang hrangah pawh khawpui faina leh chei mawina kawngah hma lak chhoh zel a nih tur thu sawiin, chumi atan chuan mipuite ṭawiawmna leh thawhpuina a ngen nghal bawk.

LMC Chairman Pu Lalzuithanga chuan sawrkarin LMC kuta Lunglei Park enkawl mawhphurhna a hlan aṭangin theih tawp chhuahin chei ṭhat dan tur ruahman a nih thu sawiin, Lunglei Park hmunhma tun hma aṭanga Padma Shri Pu J. Buana'n vantlang tana a lo humhalh tlat chu lawmawm a tih thu a sawi a. A chei ṭhatna atana sum ruahmansaktu Mizoram Chief Minister leh a thawhpuite, Bialtu MLA leh department lam hma lakpuinaah te lawm thu sawiin, a thawktute'n ṭha taka an thawh a beisei thu a sawi a. Hna thawh lai leh thawh zawh hnua ṭha taka enkawl chu mipuite mawh a ni dawn tih sawiin, NGO leh mipuite'n theih tawpa vil leh venpui turin a chah.

LMC Vice Chairman Pu K. Lalrinawma'n hun kaihruaiin, Lunglei District Urban Development Officer Pi Lalhruaitluangi'n report pe a. Lunglei Park chei ṭhat hnaah hian 57ft x 13ft-a zau in chhawng hnih sakna tur te, thil pho chhuahna leh vantlang thil huaihawtna tur hmun awl, naupang infiamna tur leh ṭhut chawlhna siamna tur te, tuallai khawnvar dahna tur te, lungrem leh lemker chi hrang hrang siamna tur te, a chhuat zawl siam ṭhatna leh a hungna siamna tur te a tel tih a sawi.

Lunglei Park chei ṭhat hna hi Urban Infrastructure Development Fund (UIDF) hnuaiah cheng nuai 200 senga thawh tur niin, Urban Development & Poverty Alleviation (UD&PA) Department enkawlna hnuaiah hna thawk tur hian A3 Design Build, Zonuam, Aizawl te thlan an ni a. Hna hi July ni 30, 2026 khan ṭan niin, thla 18 chhunga zawh tur a ni.