1829/2026-2027

Lunglei, 2026 Thlazing ni 17: Mizoram sawrkara Health & Family Welfare Minister Pi Lalrinpuii chuan vawiin khan Ministry of Tribal Affairs hnuaia Article 275 kal tlanga cheng nuai 470 senga Lunglei Zobawk South-a Auditorium sak tur chu a lungphum a phum.

Auditorium lungphum phum puala Zobawk South BNRGSK Hall-a inkhawm tawi buatsaihah Minister Pi Lalrinpuii chuan Zobawka Auditorium sak tur chu Lunglei khawpui chhunga Auditorium ṭha ber tur a nih thu leh Zobawk chu town area a nihzia lantir nan Zobawkah dah a nih thu sawiin, Auditorium chu Lunglei khawpui pum pui tana hman theih tur a nih rualin, a chhawr ber turte chu Zobawk khawtlang an nih thu a sawi a. Contractor Excel Consultancy Services te'n ṭha tak leh chak taka hna an thawk chu lawmawm a tih thu sawiin, khawtlang hruaitute leh mipuiin ṭha taka vil tur leh enkawl zui turin a chah.

Minister Pi Lalrinpuii chuan Zobawk khawtlang hmasawnna tura ruahmanna hrang hrang awmte tar langin, Zobawk North-ah Health Clinic Centre sak thar hawn a nih tur thu te, Zobawk South Sub-Centre chu a hmun sawn turin vantlang ram ruahman fel a nih tawh thu leh fur zawh veleh SASCI aṭanga sak ṭan nghal theih beisei a nih thu te, Zobawk North-ah thiam thil bik zir theihna, HDFC RSETI training centre sak a nih tur thu te a sawi a. Sawnngai–Nisapui inkara Agriculture Link Road laihna tur cheng vaibelchhe 200 pawm fel a nih tawh thu leh fur zawhah hna ṭan a nih tur thu sawiin, Zobawka Bazar Shed sakna tur pawh ruahman mek a nih thu a sawi a. MLA Fund leh LMC Ward Councillor Fund aṭangin hma lakna hrang hrang kalpui a ni bawk tih sawiin, MLA Fund hmangin zirtirtu rawih an nih thu te, Zobawk North Health Clinic Centre hawn thar tura thawk tur Health Worker pawh MLA Fund aṭanga chhawr tur a nih thu te a sawi a. Zobawk ram chhunga Fisheries hmunhma pawh khualzin hipna atana cheibawl turin Ward Councillor-in ngawrh taka hma a lak thu leh a hlawhtlin thuai a beisei thu a sawi.

Lunglei Municipal Council (LMC) Ward No. XI Councillor Pu Vanlalliana Pachuau chuan hun kaihruaiin, Zobawka Auditorium sak a nih theih nana theih tawp chhuaha hma lakpuitu Minister leh Bialtu MLA Pi Lalrinpuii chungah lawm thu a sawi a. Zobawk South Local Council Chairman Pu H. Vanlalhruaia pawhin thu sawiin, PWD Lunglei Building Project Division-a Sr Executive Engineer Er Zodingliana leh contractor lam te'n technical report an pe bawk.

Zobawk Auditorium hi chhawng hniha sak niin, a chhawng hnuaiah conference hall, committee room, kitchen, toilet leh parking te awm tura ruahman a ni a. A chhawng chungah badminton court pahnih, table tennis board pahnih, office room leh dressing room (hmeichhia leh mipa) te awm tura ruahman a ni bawk.