1830/2026-2027

Lunglei, 2026 Thlazing ni 17: ECRP-II sum cheng nuai 22.5 senga sak, Zobawk North Health Clinic Centre building thar chu Mizoram sawrkara Health & Family Welfare Minister Pi Lalrinpuii chuan vawiin khan a hawng.

Health Minister Pi Lalrinpuii chuan Zobawk North khawtlangin health clinic centre an mamawhna an thlen chu theih tawpa kawng zawn a nih hnuah harsa taka dah a nih thu sawiin, building thar hawn theih a ni ta chu lawmawm a tih thu a sawi a. Health Clinic Centre chu a enkawlna sum awm sa a nih loh avangin sawrkar leh mipui ṭan rualnaa enkawl a ṭul thu sawiin, a chhiat a ṭhatah Zobawk North khawtlang chuan an mawhah la turin a chah a. Health Clinic Centre sakna atana khawtlang hmangaiha ram petu Pu Lalzama te chhungkaw chungah lawm thu sawiin, Health Clinic Centre nuam leh ṭangkai tak a nih theih nan a hmunhma tihfai leh chei mawi kawngah te, a enkawl zuina kawng hrang hrangah te neitu nihna rilru nen theih tawp chhuahpui turin khawtlang mipuite a chah.

Health Minister, Lunglei East bialtu MLA Pi Lalrinpuii chuan Zobawk North Health Clinic Centre-a Health Worker thawk tur chu MLA Fund aṭanga rawih a nih tur thu sawiin, a panna kawng pawh siam ṭhat dan ngaihtuah vat a nih tur thu a sawi a. Lunglei Senior Chief Medical Office-in damdawi leh hmanraw mamawhte dahin, a enkawl zuina pawh MLA Fund aṭanga ngaihtuah a nih tur thu a sawi.

Zobawk North Health Clinic Centre building thar hawnnaah hian Health Minister pasal Rev. Dr K. Sapthanga leh Lunglei Municipal Council (LMC) Ward No. XI Councillor Pu Vanlalliana Pachuau te bakah, Lunglei District-a Health & Family Welfare Department-a thawktute, khawtlang hruaitute, tlawmngai pawl leh political party hruaitute leh Zobawk North khawtlang mipuite an tel a. Lunglei District Senior Chief Medical Officer Dr Lalrinthangi chuan hun kaihruaiin, PCI Zobawk pastor Rev. Jimmy Lalsiammawia Fanai chuan hunserh a hmang.