1831/2026-2027

Lunglei, 2026 Thlazing ni 17: July 24–25, 2026 chhunga State Convention Centre, Shillong, Meghalaya-a National Buyer–Seller Meet cum Exhibition (NBSM), 2026 buatsaihah Best Seller Award dawngtu Lunglei District-a Mualṭhuam North khaw mi Pi Lalniliani (Mesak Weaves) chu vawiin khan Lunglei District Bawrhsap Pi Navneet Mann chuan a hna thawh pindanah thingpui inpuiin, lawmpuina a hlan.

Bawrhsap Pi Navneet Mann chuan Pi Lalniliani chu a hlawhtlinnaah a lawmpui thu sawiin, hmasawn zel turin duhsakna a hlan a. A hma lakna kawngah DC Office chuan a theih ang anga puih an inhuam thu sawiin, District tihmingṭhatu leh mi dangte cho phurtu ni zel turin a chah a. DC Office hmingin lawmpuina thilpek a hlan nghal bawk.

He hunah hian Mesak Weaves neitunu Pi Lalniliani chuan NBSM 2026-a a tel dan chanchin sawiin, a thil tawnte leh hmachhawp a neih hrang hrangte a sawi a. NBSM 2026-a a tel theihna tura buaipuitute, kawng hrang hranga hma lakpuitu leh amah lawmpuitu sawrkar department, pawl leh mi malte chungah lawm thu a sawi.

Mizoram State Rural Livelihoods Mission (MzSRLM) hnuaia Khuangchawi Self Help Group (SHG) member, Mesak Weaves neitunu Pi Lalniliani hi College of Community Science, Central Agricultural University (Imphal), Tura, Meghalaya te huaihawta July 24–25, 2026 chhunga Shillong, Meghalaya-a National Buyer–Seller Meet cum Exhibition (NBSM), 2026 buatsaihah telin, Best Seller Award a dawng a. Hei bakah hian Indian Institute of Entrepreneurship (IIE)-in North East-a Entrepreneurship ṭha leh hmasawn tura an beiseite hnena Entrepreneurs Award an hlan ṭhin chu dawng bawkin, Award hian cheng nuai 5 (₹5,00,000/-) a keng tel a ni.