1591/2025-2026

Dated Aizawl, 25th September, 2025: Vawiin khan Mizoram State Pharmacy Council buatsaihin World Pharmacists Day 2025 lawmna hun, Vanapa Hall, Aizawl-ah hman a ni a. Health & Family Welfare Minister Pi Lalrinpuii chuan khuallian niin hun a hmanpui a, Dr. Sanjay D. Sawant, Director, RIPANS chu khual zahawm niin Pu F. Lalliantluanga Executive Committe Member, Mizoram State Pharmacy Council chuan hun hi a kaihruai a ni.

Health Minister chuan pharmacist-te pawimawhzia sawiin, ‘damdawi siam dan atanga mipuite hnena hralhchhuah dan thlenga thiamna bik nei an nih avangin an pawimawh hle a, Healthcare System hi an tel loin a kal thei lo a ni’ a ti a. Damdawite hi a nih dan tur ang taka temperature, humidity leh ni engahte vawn that an nih loh emaw, a ei hun leh ei dan dik takte inhrilh hriat a nih loh emaw chuan, a chakna leh hnathawh dante danglam theiin nunna hialin a tuar theih thu a sawi a, damdawi dawr reng reng chu, danin a phut angin damdawi lam thiam, Pharmacist dik takte ngeiin nghakin, an hun pumin damdawi dawr chu an vil vek tur a ni a ti.

Mipuite harsatna sukiang tura Sawrkar hmalaknate tarlangin, tun dinhmunah Pharmacist - 17 (Contract), Assistant Director - 3 leh Drugs Testing Laboratory-a thawk tur Junior Analyst - 3 lakna tura hma lak mek a nih thu a sawi a. Heng bakah hian Mizorama PHC, CHC zawng zawng leh District Hospital tinahte Pharmacist dah vek tura hmalak a nih thu a sawi bawk a. Mizorama Cancer tam lutuk chhan zir chianna nei tura hmalak tum a nih thu pawh sawiin Pharmacist-te an pawimawh hle dawn a ni a ti bawk.

World Pharmacists Day lawmnaah hian Dr. Sanjay D. Sawant, Director, RIPANS leh Dr. H. Lalhlenmawia, Vice President, Mizoram State Pharmacy Council ten thu an sawi bawk a; Mizorama Pharmacy zirna college hrang hrang, RIPANS; Laithangpuii College of Pharmacy; Mizoram Institute of Pharmaceutical Sciences; Blessino Pharmacy Institute zirlaite leh Pharmacist hnathawk lai mekte an tel a ni.

Pharmacy Act, 1948  (Sec. 42) a tarlan angin, damdawi reng rengte hi Registered Pharmacistte chauh lo chuan zawrh emaw hralhchhawn emaw phal a ni lo  a, Dan zawm lote chu Drugs & Cosmetics Act, 1940 – Sec. 18(c) leh Sec. 27 hmangin kum 3 thleng lungin tan leh pawisa chawi theihna a ni.