2732/2026-2027

Aizawl dated 19th October 2026: Scientific Forum, Zoram Medical College & Hospital bultuma , 'Scientific Fest 2026 - CME on Breast Cancer - Awareness today, healthier tomorrow' tih thupui hmanga buatsaih chu Health & Family Welfare Minister Pi Lalrinpuii chuan khuallian niin a hmanpui a. Prof. Zorinsangi Varte, Registrar, ZMC& H chuan kalkhawmte lawmna thu a sawi.

Health Minister Pi Lalrinpuii chuan Scientific Fest 2026 hawnna hunah hian Mizoram chu pum, chaw kawng, chuap leh hnute cancer tamna a nih thu sawiin ZMC & H Scientific Fest 2026 atana ‘Continuing Medical Education on Breast Cancer’ hman a ni chu a pawimawh hle thu a sawi a. Cancer natna do tur hian Early detection - a rang thei ang bera natna hmuh chhuah, Timely treatment - a hun taka enkawl leh Comprehensive Patient Care - Enkawlna kimchang pek a pawimawh thu a sawi a. Cancer leh natna dang laka invenna pawimawh hmasa ber chu inzirtirna tha pek a nih thu sawiin, Cancer laka inveng tur hian zu, zuk leh hmuam laka fihlim te, ei leh in hrisel leh hunbi vawn that te leh taksa sawizawi that a pawimawh thu te hi school leh college zirlai leh khawtlangahte inzirtir tam a pawimawh thu a sawi.

Health Minister chuan taksa penga tihrawl bawk leh dik lo deuh a awma kan hriat hian mahni rinthu a inenkawl ve ngawt lovin,  Doctor-te rang taka rawn thin a pawimawh thu a sawi a. Hei hian natna hmuh chhuah kawngah nasa takin a puih theih thu leh pawi thui zawk a thlen hma a enkawlna tha inpek theihna hun a awm theih phah bawk thu a sawi a. Cancer natna veite hian an nat dan azirin Multi-disciplinary Treatment – Surgery, Chemotherapy, Radiotherapy-te an mamawh bakah an dinhmun zangkhai leh nuam zawka siam nan Palliative Care leh Psycho-social support-te pek an mamawh thu a sawi bawk a ni.

Pi Lalrinpuii chuan Cancer natna, hma taka hriat chhuah a nih theih nan natna hmuh chhuahna khawl, Diagnostic facilities thawm chak a nih thu te, hemi kawnga thawktute thiamna tuai hriam zel a nih thu te, awlsam zawka damdawi leh enkawlna mamawh ang an dawn theih nan Referral System siamthat a nih thu a sawi a. Sawrkar hnuaia chhawmdawlna hrang hrang awmte hi mipuiah zau zawka inhrilhhriat zel a pawimawh thu a sawi a. Cancer natna laka inveng tura hriattur pawimawh hrang hrang inzirtir kawngah hian Health Department chauh ni lovin, chhungkua, khawtlang, Zirna in leh kohhran thawhhona a pawimawh thu a sawi bawk a ni.

ZMC&H Scientific Fest 2026 – CME on Breast Cancer buatsaih ah hian Prof. Swati M Patki, Dean, ZMC & H chuan Scientific Fest 2026 buatsaih a nih chhan sawi zauna hun a hmang a. Prof. Lalnunmawii Sailo, Medical Superintendent chuan mithiam sawm bikte hnenah lawmpuina thilpek hlanna hun a hmang a, Prof. John Lalliandinga, Head of Department, Dept. of General Surgery chuan vawiin thupui hmanga mithiam thusawi tura sawmte inhmelhriattirna hun a hmang bawk a ni. 

ZMC & H Scientific Fest 2026 – CME on Breast Cancer ah hian Prof. Saia Chenkual, Former HoD, Dept. of General Surgery chuan ‘Breast Cancer Awareness & My 3 Decades of Experience in Breast Cancer Surgery’ tih thupui hmangin zirtirna a pe a, Prof. L.Fimate, Former Director, ZMC&H leh RIMS pawhin thu a sawi a ni. Dr. Adami Colney, Consultant Surgical Oncologist, MSCI, Zemabawk chuan ‘Management of Breast Cancer’ tih thupui hmangin zirtirna a pe a. Dr. H.Lalremmawia, Research Associate, Dept. of Bioatechnology, MZU chuan ‘Genomic insights into Breast Cancer, Hereditary risk and Pharmacogenomics in Mizoram’, Dr. Christopher Zodinsanga Pachuau, Senior Resident, Dept. of Pathology, ZMC chuan ‘Breast carcinoma in our centre: A three years clinico-pathological and immunohistochemistry review’, Dr. Lalthanpari, Assistant Professor, Dept. of Radiodiagnosis chuan ‘From mammograms to AI: Current standards and future horizons in breast imaging’, Dr. C. Lalrindiki, Consultant Radiation Oncology chuan ‘Adjuvant treatment in early and locally advanced breast cancer’, Dr. R. Lalchhandama, Asst. Prof., Dept. of General Surgery chuan ‘Breast cancer: A clinical update from diagnosis to management’ tih thupui hmangin zirtirna an pe a. Dr. Jehovah Ringzuala Pachuau, Consultant, Dept.of General Surgery chuan ‘Perioperative measures to prevent Lymphoedema in Breast Surgery’ tih thupui hmangin zirtirna an pe bawk a ni.