547/2025-2026

Dated : Mamit the 10th of May, 2025 : Vawiin khan Pi Lalrinpuii,Health & Family Welfare Minister chuan Mamit tlawhin, District Hospital, CMO Office, NHM, District Child Protection Office leh Home hrang hrangte a tlawh.

Pi Lalrinpuii chuan Mamit District Hospital-a thawktute hmaah thusawiin Mizoram mipuite hamthatna tura Sawrkarin a duan Mizoram Universal Health Care Scheme chu mipui tana a tangkainate zirchianga in-register vek turin a chah a, a pawimawhna leh tangkaina la hrelo kan chhehvela a mite pawh hrilhhretu ni ila, he scheme hi mipuite tan a himin damloh nikhua-ah a tha em em a ni a ti. Minister chuan Sawrkar damdawiin tichaka tichangtlung turin hma nasa takin lak chhoh mek zel a ni a, Mamit District Hospital mamawh leh hmasawnna tur atana hmachhawpte pawh ngaihtuah zel a nih dawn thu a sawi, Sawrkar Damdawiin a thawktute fuihin indaihlohna chhuanlama hmang mai lova, theihtawpa taima leh rinawm taka mahni hna thawk tura chahin,  damlo te'n Sawrkar damdawiin aia Private hospital pan an chakna chhan chu Nursing care a ni thin, hei hi a pawiin a veiawm em em a, Sawrkar damdawiin-ah hian kan kalpui ve thei a ni a ti, doctor zaidam leh fel tak chu a tawngkam ringawt pawh damlote tana damna thlentu a ni thei a ni tihte hrereng turin a chah a, District Hospital khum 100 awm theihna sak zawh tawh, a sak dana duhthusam loh laite enin, eng luhna tura siam that ngaite thawktute nen an nghal bawk a ni.

Dr. Lalrinfela H, District Medical Superintendent chuan Mamit District Hospital dinhmun tlangpui tarlangin tunah hian thawktu zawng zawng 108 an awm mek a, tun aia service tha tura mamawh belh zingah Operation kalpui tura Nurse leh 4th Gr indaihlohnate, ambulance tha tawk tawhlo leh a driver tur indaihlohna avanga harsatna an neih thute a thlen a ni.

Bialtu MLA Er.H.Lalzirliana pawhin thusawiin, Mamit District Hospital thuamchakna atana hma lo lak tawhna leh hmachhawpte a tarlang bawk a ni.

Social Welfare Minister hian Mamit khawpui chhunga Home hrang hrangte,One Stop Centre leh District Programme Office te an dinhmun hrechiang tur a tlawhin, thawktute'n an lo dawngsawng a, an harsatna Minister hnena an lo thlente a ngaihthlak sak a ni. 

Pi Lalrinpuii Health Minister hi Er. H.Lalzirliana, Bialtu MLA bakah Health Department lama thawktute'n an tawiawm a ni.