Khawzawl-ah Independence Day a hman zawh hnuin Health Minister Pu Lal Thanzara chuan Khawhai-ah zan a riak a. Vawiin August ni 16 hian Khawhai chhuahsanin Biate a pan a.

Sialhawk khawtlang hotu leh mi pawimawh dang ten an lo dawngsawng a. A puala inkhawm neih a nih bakah Sialhawk khawtlang mamawh hrang hrang thlirpuiin Sialhawk PHC leh Sub-Centre a tlawh nghal a. Electric Sub Station pawh a rang lama peihfel leh hawn a nih thuai theih nan Power lam hotute a hrilh nghal bawk. Sialhawk khawtlangin a hnena mamawh an thlen te a theih chin chinah tih hlawhtlin sak a tum thu a sawi bakah Sialhawk khawtlang Mibo zawngte thingpui lumna turin Rs. 5000 a pe bawk.

Minister hian Biate lam a pan a, amah lo lawmna inkhawm hi Zialung Community Hall, Biate-ah neih a ni a. He hun hi Pu RV Hluna'n a kaihruai a. Pu Lal Thanzara chuan thu sawiin "Mizoram chu Pathianin awmna tur hmun dik takah a dah a, chanchin tha hril theiin min siam a. Ralmuang takin min awm tir a ni" a ti a. Pu Lalthanzara chuan Mizoram sawrkar hmalakna hrang hrangte a tarlang a. Chhim lama Kalodyne Multimodal Project te, Indo Bangla Border Trade, leh World Bank Project hmanga inkalpawhna tur te, Thalaite infiamna kawnga sawrkar hmalakna te, hriselna lam hawia hmasawnna kalphung te sawiin Medical College neih a nih ve dawn tak avanga Zram thalai ten mahni ram ngeia Doctor hna an zir ve theih dawn tak thu te a sawi bawk.

Minister chuan "Ram ralmuanna tih chhiat leh tih thuanawp tumin mi thenkhatin Bomb hmang ten, mipui an rikrap a, mahse heng titu te hi kan sawrkar chak chuan a man chhuak tawh a, hetiang tih chingte hi ram hmelma an ni" tiin, sawrkar thawhpui turin khawtlang mipuite a sawm a ni. Khawtlang mamawh leh harsatna hrang hrangte an sawipui a. Minister hian a tul anga hmalakpui zel a nih tur thu a sawi a ni. Hemi hnu hian Biate CHC leh Tea factory te a tlawh leh bawk.