Sawrkar laipui Ministry of DoNER leh North Eastern Council bultumin Assam Sawrkar Department of Health & Family Welfare chuan Guwahati-ah hmarchhak Health Minister-te intawhkhawmna, 1st Conclave of Health Ministers of North Eastern States-a buatsaih a. Conclave-ah hian vawiin khan Health Minister Pu Lal Thanzara chuan thu sawiin Mizoram mamawh rawtna pawimawh tak tak a thlen a ni. 

Pu Lal Thanzara chuan Mizoram chu Cancer vei tamna State a nih avangin khum 100 awm theihna Tertiary Cancer Care Centre siam mek a nih thu leh he project-in a huam tel ve loh Blood Bank chu mamawhna a san avanga siam ngei a tul thu te; District Hospital pathum - Mamit, Kolasib leh Lawngtlai te chu khum 100 awm theihna tura tih len a nih theih dan tur te leh 11th Five Year Plan hun chhunga Ministry of Health & Family Welfare Govt. of India sum hmanga sak GNM school pali leh ANM school pathumte chu thil man sang chho zelah senso tura ruahman lawksa in project pumpui a daih tak loh avangin heng ANM school leh GNM school sak zawh nan leh hman theih tura buatsaihna atan Rs. 12.75 Crore mamawh a nih thu North Eastern Council hnenah a thlen a. Civil Hospital-a dah tur MRI leh Synod Hospital Durtlanga Nursing School Main building sakna tur te chu a rang lama sanction a nih theih nan thuneitute hnenah a thlen nghal bawk a ni. 

Conclave-ah hian India hmarchhak state-a Health Minister hrang hrang ten anmahni state chhunga hriselna kawnga tul leh mamawhte thlenin an sawiho a. Pu Lal Thanzara chuan Union Minister DoNER Pu Jitendra Singh bakah hriselna kawnga Mizoram mamawh hrang hrang tih hlawhtlinna kawnga theihtawp chhuahsak thintu North Eastern Council Secretary Shri Ram Muivah te hnenah lawmthu a sawi.Health Minister hi Dr. T.Lalhmangaihi, Director,Hospital & Medical Education in a tawiawm a. Naktuk hian Mizoramah an lo kir leh dawn a ni.