Vawiin khan DC Conference Hall, Mamit-ah District Planning Committee chu a vawikhatna atan an Chairman Pi Lalbiaksangi District Bawrhsap hovin an thukhawm a. Pu Lalrinmawia Ralte MLA Hachhek Constituency leh Pu V.L Robiaka, MLA Dampa Constituency ten an telpui bawk. 

Vawiin Meeting hian District Planning Committee mawhphurhna hrang hrangte sawiho niin mipui vantlang dinhmun zirchianin hmasawnna tura ruahmanna siama chungte chu State Sorkar leh Sorkar laipuiah te thlen ni se tihte sawiho a ni a, hengbakah hian ram leilung hausakna haichhuaka hmasawnna neitura leilung fate ruahmanna siamsak te chu District Planning Committee in a tum a nih thu te meeting-dah hian tarlan a ni. 

Meeting hian Mamit District chhunga Department tinte chuan  Block wise leh District wise in District Statistical Data buatsaih vek tura tih a ni a, heng report hi 16 June 2017 hma thehluh vek ni se tih niin District chhung Department hrang hrangte hmasawnna hnathawh dan thlirho na leh ruahmanna thazawk awmte thlir hona neih a ni bawk. 

District Planning Committtee hi The 74th Constitution Amendment Act  Article 243ZD behchhana din a ni a, District chhunga hmasawnna hnathawh tur hrang hrangte duang tura din an ni. 

Meetingah hian Mamit District chhunga Sorkar Department hrang hrang te, Tlawmngai pawl YMA, MHIP leh MUP  a tangte’n an tel a ni.