Nimin khan Health Minister Pu Lal Thanzara chuan Lawngtlai District Hospital a tlawh a. Chief Medical Officer Dr Thani Pachuau leh Medical Superintendent Dr Lalmalsawmi Hmar hovin District Hospital-a thawkte'n an lo dawngsawng.
Pu Lal Thanzara chuan Health Department hnuaia thawktute file chu an mihringpuite an nih avangin department dang nen khaikhin theih a ni lo va, thawktute chu an inthlahdah a rem ve lo a ni, a ti a. Damdawi in lama thawkte chuan an hna chu Pathian rawngbawlnaa ngaia an thawh a tul a; chuti anga ngai lem lote tan chuan thawh chi pawh a ni vak lo, a ti a. An mihringpuite enkawl a, an dam khawchhuah nana hna thawktu an nih avangin inpekna thuk zawk nena nasa zawka tan la turin thawktute a fuih.
Health Minister chuan Falkawna Referral Hospital tihchangtlun nan hma lak chhunzawm zel a nih thu te, Mizoramin Medical College a neih ngei theih nan hma lak mek a nih thu te sawiin, Health Worker eng emaw zat la thar tura sawrkar a inbuatsaih mek thu te a sawi a. Infant Mortality Rate (Nausen thihna) tihniam tura tan a ngaih thu leh mipuite pawh he lam hawia an thanharh deuh deuh a tul thu a sawi bawk.
CMO leh Medical Superintendent te'n hriselna lama hmasawn nana Lawngtlai District mamawh an thlente chu Health Minister hian a theih ang anga lo bawhzui a, a changtu department hrang hrang hotute lo sawipui a tum thu a sawi bawk.
Health Minister hian District Hospital bakah CMO Office leh health worker training-na tur ANM School te a tlawh bawk a. ANM School hi kumin April thla hian hawn hman beisei a ni.
 
 

Attachment

  • Loading attachment...