Vawiin chawhnu dar 3.00 khan Health Minister Pu Lalrinliana Sailo hovin ama pisaah Smoke Free Mizoram Coalition (SFMC) meeting vawi 3-na neih a ni a; he meeting-ah hian Parliamentary Secretary (Health) Pu S. Laldingliana bakah Health Secretary Pi M. Zohmingthangi te, SFMC member-te an tel kim hle a ni.
He meeting-ah hian SFMC thurel tawhte bawhzui dan Dr Jane Ralte, State Nodal Officer hnen atangin ngaihthlak a ni a. Vaihhlozial te, tuibur te, sahdah te chu hriselna atana hlauhawm a nihzia a leitu leh hmangtute chhiar theih tura tarlan a nih loh chuan COTPA Section 7 hnuaiah man leh pawisa chawitir theih a nih anga ngawrh zawk leh khauh zawka kenkawh ni se tia rel a ni a. Vaihhlo kaihhnawih thil chi hrang hrangin hriselna a tihchhiat theih zia leh cancer thlentu bulpui a nihziate damdawi lam thiamten TV lamah sawihona hun hmang se tih pawh rel a ni. Tin, naupang zawkte rilruah meizuk leh vaihhlo kaihhnawih thilte a that lohzia uluk zawka zirtir an nih theihna turin School Education Department nena tanho dan kawng dap chu meeting chuan tha a ti a. Tlawmngai pawl leh thalaite inhmuhkhawmna hmun apianga mizuk thatlohna zirtirna hun hman dan kawng dap ni se tiin meeting chuan a rel a ni.
India ram pawn atanga cigarette lakluh thinte chu meizuk hlauhawmzia hriattirna inbel lo a nih thin avangin dan anga man theih a nih thu meeting-ah hian sawi a ni a; kum 2011-12 chhung hian Central Customs&Excise pawhin Mizoram chhungah hetiang cigarette hi cheng nuai 9 man hu vel an lo man tawh nghe nghe a ni. Aizawl leh khawpui hmun danga khapna hmuna meizu vaitu Anti Tobacco Squad te chu ngawrh lehzuala feh chhuak thin turin meeting chuan a rel bawk.
